Уста кидыште паша шолеш

Киндым куштышо да погышо механизаторын пашаже куштылго огыл, арам огыл совет жапыште нуным кугун жапленыт да пагаленыт.
Поснак, конешне, комбайнер-влакым чапландареныт, но моло пашаеҥымат монден огытыл. Кызытат огыт мондо. Вет сай лектышым налмаш комбайнер-влак дечын веле огыл, тыгак идымыште пашам ыштыше-влак дечын кугун шога. Кондымо шурным келшышын аралыман да коштыман.
Вадим Гасимьянович лач идымыште тырша – куатле трактор-погрузчик дене пашам ышта. Техникыже йот элыште ыштыме да усталыкым йодшан. Но Россий калык нимгогай йот элысе техника дечын ок лўд – чыла машина дене пашам ыштен мошта. Вадим Хафизоват чыла техникым сорлыклен кертеш. Механизатор кўчык жапыште тиде погрузчикым виктараш тунемын. Ленинский ялысе идымыште тудын полшымо дене тўрлӧ пашам шукта: амбар кӧргыштӧ чулымын кудалыштеш, идым оралтыште шурным чумыра, элеваторышко кайыше машина-влакын кузовышкышт опта... Моло пашамат шукта. Икманаш, идымыште кечыгут дене тырша.
Вениамин КОНДОГИН.