«Кушталте, таҥем»

Конкурс «Кидкопаште кече» йоча творчество фестиваль кышкарыште эртаралтын. Тиде кечын Мишкан селасе культура дворецышке талантан йоча-влак Мишкан, Пўрӧ да Караидель районла гыч толыныт.
Конкурс деч ончыч самырык куштызо-влаклан салам шомакым жюри председатель – РФ-н да БР культурын заслуженный пашаеҥже, Я. Ялкайн лўмеш премийын лауреатше, Мишкан районын почетан гражданинже Яков Янгубаев ойлен. Тылеч вара ўдыр-эрге-влак сценыш кушташ лектыныт.
Конкурсант-влак ийгот шотышто кум тўшкалан шелылтыныт: 7-10 ияш-влак, 11-14 ияш-влак да 15-18 ияш-влак. Тыгак «Кугу ансамбль» да «Изи ансамбль» номинаций-влак лийыныт.
Жюрим усталыкышт дене «Смайлики» (Озерка ялысе клуб), «Вдохновение» (Йылыш ялысе клуб), «Шонанпыл» (Тымбай ялысе Культура пӧрт), «Иняк» (Йылыш ялысе клуб), «Ший памаш» (Монар ялысе Культура пӧрт), «Пеледыш» (Кўрзе ялысе Культура пӧрт), «Акарт» (Ардаш ялысе Культура пӧрт) ӧрыктареныт. Ончышо-влак тыгак «Солнышко» 1 №-ан йоча садыш коштшо йоча-влакын куштымыштым шокшын вашлийыныт. Нуно «Теве тылат пурла кид» куштымашым ямлын куштеныт.
Дуэт дене Ардаш, Чорай, Озерка да Монар гыч толшо самырык куштызо-влак куштеныт.
«Изи ансамбль» номинацийыште (15-18 ияш-влак) Гран-прим «Сўан» куштымаш дене Тымбай ялысе Культура пӧрт пеленсе «Рвезылык» куштышо коллектив сулен налын.
«Кугу ансамбль» номинацийыште (11-14 ияш-влак) жюрим усталыкше дене ДШИ-н «Вдохновение» хореографический йоча ансамбльже ӧрыктарен. Нине самырык куштызо-влак Гран-прим «Весела куштымаш» дене сулен налыныт.
Уна-влакат жюри ден ончышо-влакым куандареныт. Караидель районысо Шопкер ялысе клуб гыч Доминика Аймурзина толын, Пўрӧ оласе Изи Соказа ял гыч - дуэт. Нунат «Весела куштымашым» кушталтеныт.
- «Кушталте, таҥем!» конкурс Тўнямбалсе куштымаш кечылан лўмлалтын, - ойла йоча-влак дене паша шотышто методист Марина Минилбаева. – Районысо Культура дворецын сценыштыже самырык артист-влак тўрлӧ ямле да оҥай куштымашым куштеныт. Номер-влак ончышо-влаклан ятыр куаным пєлекленыт! Конкурсышто сеҥалтше лийын огыл – чыланат сеҥеныт! Участник-влак жюри ден калыклан шкеныштын усталыкыштым ончыктеныт, ончышо-влак ятыр оҥай выступленийым ужыныт. Кажне куштымаш шке семынже моткоч оҥай, мотор да ямле лийын. Вургем-влакат моторлыкышт дене ӧрыктареныт, музыкальный оформленият кўлеш кўкшытыштӧ лийын. Икманаш, конкурс пеш сайын эртен да чылаланат ятыр куаным пєлеклен.
Светлана ТОЙМУРЗИНА.