«Писатель дене палыме лиймаш»

В. Баныкин 1916 ий 14 ноябрьыште Ставрополь олаште (кызыт Тольятти) шочын. Йоча да самырык жапше куштылго огыл саманыште эртен. Тидлан кєра пашам тудлан самырыкше годымак 16 ияш гыч ышташ тўҥалаш пернен. Пашам тўрлє вере ыштен: районный газетын корреспондентше, библиотекарь, калык образований отделыште безграмотностьым пытарыме шотышто инспектор лийын. 1939 ийыште тудын икымше «Рассказы о Чапаеве» книгаже лектын. 1940 гыч 1945 ий марте В. Баныкин кугу оборонный предприятийыште пашам ыштен. Завод самырык писательлан сай университет лийын. Кугу Отечественный сар жапыште В. Баныкинын эше кок книгаже ош тўням ужын: «Соседи» да «В наши дни». Нине книгалаште сеҥымаш верч тылыште тыршыше-влак нерген возалтеш. Повестьлаштыже тўҥ герой-влак пашаче улыт – агроном, шофер, волгарь-речник, завод пашаеҥ...
Писательын юбилейже вашеш Мишкан селасе йоча модельный библиотекыште «Писатель дене палыме лиймаш» лўман литератур шагат эртаралтын. Тушто изи лудшо-влак Виктор Баныкинын творчествыже да илыш корныж дене палыме лийыныт. Тўҥ библиотекарь Е. Князева «Герои книг Виктора Баныкина» книга выставке дене палдарен. Варажым чыланат писательын «Вороньи качели» ойлымашыжым колыштыныт. Колыштмеке, йоча-влак тўрлӧ йодыш-влаклан вашмутым пуэныт, произведенийым тергеныт. Мероприятий «Ворона – самая умная птица» документальный фильмым ончымаш да тудым тергымаш дене мучашлалтын.
Е. КНЯЗЕВА, тўҥ библиотекарь.