Книга дене йолташ лийза

Тиде кечын Мишкан районысо чыла библиотекыштат лудмаш площадке-влак ышталтыныт, мероприятийлашке чылаже 500 утла еҥ ушнен.

Рўдє районный библиотекыште лудшо-влаклан «Йырым-ваш ончымо орава» выставке ямдылалтын. Тиде выставкым ончышо-влак ораван тудым айдеме шонен лукмо жап гыч кызытсе саман марте вияҥ толмыж нерген пален налын кертыт. Тудет научно-технический прогресслан кӧра палыдымын вашталтын.
Мероприятийышке медиаперсона-влакым ўжмӧ, нуно лудмашын пайдаже – айдемылан ятыр шинчымашым пумыж нерген умылтарат.

Ирсай ялысе библиотекыште - 7 №-ан филиалыште «Аксаковым лудына» йўкын лудмаш эртен. Тушто лудшо-влакым С. Т. Аксаковын илыш-корныжо да произведенийлаж дене палдарыме.
Тиде писатель руш литературын историйышкыже руш йылмым ик эн сайын палыше да тудым аклен моштышо еҥ семын пурен. Россий культура летописьыште
С. Аксаков театральный критик да лўмлӧ бытописатель - краевед семын палыме улеш. Тудо пўртўс нергенат шагал огыл возен. Верысе библиотекарь мероприятий
вашеш «Аксаков. Илыш-корныжо. Творчествыже. Пўрымашыже» книга выставкым ямдылен.

Тымбай ялысе библиотек – 21 №-ан филиал С. Аксаковын «Ал пеледыш» («Аленький цветочек») произведенийже почеш «Эн сайжым луд» книга лудмашым эртарен. Тиде произведений почеш мультфильм возалтын, сандене тудым чыланат сайын палат. Йомакым лудмеке, изи лудшо-влак тудын нерген мутланеныт да произведений почеш посна викторина ден конкурсышто шинчымашыштым тергеныт.

Чорай ялысе библиотек – 23 №-ан филиал «Тўнямбал наукын генийже» тематический библиотечный урокым эртарен. Урок М. В. Ломоносовын шочмыжлан 310
ий теммылан лўмлалтын. Библиотекарь лудшо-влакым М. Ломоносовын илыш корныжо, творчествыже да научный пашаже-влак дене палдарен.
Кемий ялысе модельный библиотекыште – 3 №-ан филиалыште мероприятий «Наукыш путешествий» квест-модмаш йєн дене эртен. Тыгай йєн кажне лудшылан жаплан шымлызе да изобретатель лияш полша. Модмаш групповой форма дене эртен. Мероприятийыште йоча-влак ятыр у шинчымашым налыныт, тыгак тўрлӧ интерактивный заданий-влакым шуктеныт, головоломка, ребус, кроссворд-влакым решатленыт, пиктограмме-влакым лудыныт.

Кўрзе ялысе библиотекыште – 2 №-ан филиалыште «Азбука бука огыл, оҥай наука» лўман мероприятий эртен. Тушко пенсийыште улшо ончысо туныктышо, «Калык просвещенийын отличникше» М. М. Яметовым ўжмӧ. Тудо лудшо-влак дене «Кызытсе саманыште грамотный улмаш мо тыгане?» лўман мутланымашым эртарен. Тылеч вара лудшо-влакын грамотный улмыштым текшырыме. Нуно тўрлє ребус ден шараде-влакым решатленыт, буква-влак дене модыныт, «Буква
конструкторым» чоҥеныт. Модмаш мучаште «Ушан зарядке» эртаралтын. Мероприятий вашеш библиотекарь «Йылмем яндар да кўдыратле» книга выставке ямдылен, лудшо-влаклан «Грамотный улмаш – модныйлан шотлалтеш» лаштык-влак шалатен.

Изи Накаряк ялысе библиотекыште 15 №-ан филиалыште «Мунло наука-влак йокрок огытыл» квест-модмаш эртаралтын. Модмаште ятыр заданийым шукташ кўлын. Стартыште кажне командылан карте-схемым пуымо, сеҥымашке тудын полшымо дене шуаш кўлын.
Фирдаус КАДИКОВА ямдылен.