«Книга олаш путешествий»

Шукерте огыл йоча модельный библиотекыш Мишкан селасе 1 №-ан лицейыште 2А классыште (класс вуйлатышышт С. Бикмухаметова) тунемше-влак миеныт.
Нунылан «Книга олаш путешествий» лўман экскурсийым эртарыме.
Тиде кечын книгагудыш мийыше тунемше-влак кокла гыч, южыжо библиотекыш, конешне, йоча садыш коштмыж годымак возалтын, но южыжо икымше гана миен лийын. Сандене библиотекарь-влак ўдыр-эрге-влаклан чыла ончыктеныт да умылтареныт: кушто могай отдел-влак улыт – абонемент, лудмо зал, книгам лудаш кузе налман, шкем кузе кучыман… Палдарымашым йоча модельный библиотекын тўҥ библиографше Л. Яхина эртарен.
Экскурсий абонементыште тўҥалын. Ондак библиотекарь лудшын формулярже мо тугай умылтарен, вара кузе возалташ туныктен, книга фонд дене палдарен, йоча модельный библиотекыште чылаже мыняр книга улмым рашемден ойлен. Тылеч вара тунемше-влак библиотекыште книгам кычалаш тунемыныт, каталог да каталожный карточка дене палыме лийыныт, библиотекарь полшымо дене каталог почеш книгам муыныт.
Варажым чыланат лудмо залыш каеныт. Тыште йоча-влак периодический изданий-влак дене палыме лийыныт. Тиде кечын нунылан «Йоча журнал-влак юзо эл» выставка ямдылалтын. Экскурсий мучаште тунемше-влакым йоча модельный библиотекын базыж дене палдарыме. 2011 ий гыч библиотек пелен «Серлагыш» марий декоративно-прикладной искусство мастерской» пашам ышта. Л. Яхина йоча-влакым тиде мастерскойын участникше лияш ўжын.
Экскурсий йоча-влаклан оҥай да пайдале лийын. Нуно чынжымак юзо олашке миен толыныт. Тиде олаште пєрт-влак олмеш книга шкаф-влак шогат, нине «пӧртлаште» кажне пачашыште тўрлє книга-влак илат. А книгам почат гын, эше вес – оҥай да юзо сандалык почылтеш.
Л. ЯХИНА, йоча модельный библиотекын тўҥ библиографше.