Все новости
Культура
2 Ӱярня , 16:09

Шочмо йылме дошкольный учрежденийлаште

Мландўмбалне ятыр еҥ ик йылмым веле огыл пала – элысе официальный йылме деч посна шочмо йылмыж дене мутлана, тидлан кӧра дошкольный образованийыште шочмо йылмым туныктымаш посна верым налеш.

Шочмо йылме дошкольный учрежденийлаште
Мишкан районыштат дошкольник-влак шочмо йылмыштым тунемын кертыт. Марий йылмым изи йоча-влак Мишкан селасе «Родничок» 4 №-ан, Чорай ялысе марий гимназий, Кугу Соказа, Корак, Кемий, Монар ялласе школ-влак пеленсе дошкольный группылаште тунемыт. Тўнямбалсе шочмо йылме кече вашеш чыла нине учрежденийлаште пайремлан лўмлалтше мероприятий-влак эртеныт.
«Кувавай деке унала»
Мишкан селасе «Родничок» 4 №-ан йоча садыште марий йылмым тунемме группа пашам ышта. Тўнямбалсе шочмо йылме кече вашеш тиде садикыште педагог Алена Иванова кугурак группыласе йоча-влак дене «Кувавай деке унала» мероприятийым эртарен.
...Эрге ден ўдыр-влак пайрем кечын кенета кувава пєлемыш логалыныт. Тыште ожсо да кызытсе марий вургем выставка лийын. Пайремлан курчак-влакланат марий вургемым чиктыме. А пырдыжеш калык вургемым чийыше йоча-влакым сўретлыме сўрет-влакым сакалыме. Тушто марий йоча-влак веле огыл, тыгак пошкырт, руш, одо да моло ўдыр-эрге-влак лийыныт.
- Ме шуко тўрлӧ калык илыме республикыште илена. Тыште тўрлӧ калык шуко гынат, ме чыланат икте-весынам пагалена да пеҥгыде кылым кучена, - палемден куваван рольжым модшо Алена Григорьевна. – Ончалза – марий вургем моло калыкын вургемже дечын палын ойыртемалтеш, вургемна-влак тўрлӧ тўрлан моткоч поян улыт. Чыла нине тўрым кид дене мемнан авана ден кувавана-влак тўрленыт. Марий вургемым чийыше ўдыр-влак пеледышан аланыш логалшыла койыт...
Йоча-влаклан поснак куваван сундукшо келшен, тушто тўрлӧ оҥай арвер киен: такия, акай, чокан ўштӧ... Алена Григорьевна умылтарен: ятыр арверым ыштыме годым ший оксам, тўрлӧ шырчам, бисерым, «кишке шинчам» кучылтыныт.
Марий йылмым тунемаш марла ойлымым колыштмаш, почеламут-влакым тунеммаш, туштым туштымаш, марий книга-влакым лудмаш полшат. Йоча-влак мероприятийыште шочмо йылме дене ава, шочмо кундем, шошо нерген почеламут-влакым кумылын лудыныт. Варажым туштым туштеныт, «Реве» йомакым марла модын ончыктеныт, марий такмак-влакым муреныт, марла куштымашым куштеныт. Мучашлан чыланат «Йондал» да «Колялук» марий калык модмаш-влак дене модыныт.
О. БАЙРАМОВА.