+32 °С
Ясно
Культура
31 Декабря 2020, 21:00
Йылыш ялыштат «Шорыкйолым» эртареныт
Марий калыкын йӱла пайремже-влак эре муро да куштымаш дене пойдаралтыныт. Мишканыш финн-угор тӱнян культурный столицыжым почаш толшо уна-влакымат муро дене вашлийыныт.
Йылыш ялыштат «Шорыкйолым» эртареныт
Башкортостанын тӱрлӧ районлаж гыч, вес кундемла гыч толшо уна-влакым Йылыш ял калык муро дене вашлийын, а Алексеевмыт еш шке сурт омсажым комдык почын. Ты пайремлан ямдылалтме годым йылыш-влак акрет годсо кугезына-влакын эртарыме йӱлаштым тӱрыснек кучылташ тыршеныт. Кеч-могай пайремыштат тӱҥ верыш уна-влакым сийлымаш лектеш. Тидын шотышто сурт оза-влак да полышкалышышт чот тыршеныт. А пайремым сӧрастараш полшышо Васлий кува ден кугыза-влак поснак сӧрал койыныт. Нуно шке «пашаштым» тӱҥалтыш гыч мучаш марте шуктымеке, уремыште чылан пырля кандырам пунен куштеныт. Вара сурт оза-влак 12 лум каваным молан ыштыме нерген умылтареныт. Кажне каваныште могай-гынат шурно парча, шудо керешталтын. Тидыже Ош Поро Кугу Юмо деч поян лектышым йодмаш дене кылдалтын. А ожно тыгай йӧн дене шурно лектыш могай лийшашым мужедыныт: мардеж шурно парчалам пуэн шалата гын, шужен ий лиеш, чылажат верыште кодеш гын, шурно ума, а лум леведеш гын - эшеат сай лийын.
Чыла йӱлам ончыктымеке, поро оза-влак тора уна-влакым ужатеныт да пошкудышт дене пырля пайремым умбакыже шуэныт.
Татьяна ГОРДЕЕВА.
