Юзо кайык Мишкан мландыш толын

Юзо кайык Мишкан мландыш толын

Кодший июнь тылзыште Мишкан 2020 ийыште пӱтынь финн-угор тӱнян культура рӱдыжӧ лияш чапым сеҥен налын. 6 январьыште районысо Культура дворецыште тидын лӱмеш торжественный мероприятий эртен.

Финн-угор тӱнян культура рӱдыжым торжественно почмашке делегат-влак Эстоний, Удмурт Республикысе Шаркан районысо Тошто Быги ял – финн-угор тӱнян икымше культура рӱдыжӧ, Марий Эл гыч – эн шуко унаже финн-угор тӱнян кодшийсе культура рӱдыжӧ – Унчо кундем гыч лийын, тыгак Пошкырт кундемын тӱрлӧ олаж ден районлаж гычын толыныт. Пайремыште марий, одо, эрзя, мокша, сету-влак лийыныт.

Пагалыме уна семын БР-се культура министр икымше заместительже Наталья Лапшина, РФ Государственный думын депутатше, Россий паралимпийский комитетын вице-президентше Рима Баталова, БР-се Калык келшымаш пєртын директоржо Ильгиз

Султанмуратов, «Башкортостан Республикысе финн-угор калык-влак ассамблей» региональный общественный организаций

советын председательже, «Башкортостан Республикысе мордва национально-культурный рӱдер» региональный общественный

организацийын исполком председательже Юлия Герасимова, «Обиница – финн-угор тӱнян 2015 ийысе культура рӱдыжӧ» проект

вуйлатыше Риека Хырн толыныт.

Мероприятий тӱҥалтыште уна-влак ден верысе калыкым Мишкан район МР администраций вуйлатыше Павел Трапезников

саламлен.

- Ме мыланна тыгай чапым пуымылан кугешнен илена да ӱшаным шукташ тыршена. Финн-угор тӱнян рӱдыжӧ лиймаш марий

калыкын культурыжым вияҥдаш полшымылан ӱшанем, - каласен шке выступленийыштыже районадминистраций вуйлатыше.

Тылеч вара салам шомакым пагален ӱжмӧ уна-влак – Н. Лапшина ден Р. Баталова ойленыт. Варажым мероприятийын эн торжественный ужашыже – проектын символжым кучыктымаш тӱҥалын. Сценышке Марий Элысе Морко район МР администраций

вуйлатышын икымше заместительже Алексей Васильев лектын.

Тудо Мишкан калыкым тиде чапле событий дене саламлен да идалыкым сайын эртараш, тӱрлӧ мероприятийлашке толшо уна-

влакын кумылыштым волташ огыл тыланен. Юзо кайыкым Мишкан сельсовет СП вуйлатыше Рустам Ишмакаевлан Марий Элысе Шоруньжа сельсовет СП администраций вуйлатыше Иван Евсеев кучыктен. Мишкан селаште тиде юзо кайык вес ий марте илаш

тӱҥалеш.

2020 ийысе финн-угор культура рӱдерын символжо верысе кундемын озаже – Маска лийын. Тудо шке кидыштыже тиде проектын символжым пеҥгыдын кучен. Рустам Адгатович юзо кайыкым кучышо пу маскам Шоруньжа сельсовет сельский поселений

администраций вуйлатышылан пєлеклен.

Пӧлек-влакым кучыктымо деч вара сценышке мӱндыр Эстоний гыч унам – сету (финн-угор калык-влак тӱшкаш пурышо, эстон-влаклан лишыл изи калык) ӱдырамаш Риека Хырным ӱжмӧ. Тудо шкенжын выступленийыштыже палемден: «Финн-угор тӱнян культурный столицыже лиймаш верысе марий калыклан йылмыж ден йӱлажым аралаш кумылаҥдышашым да шкеж нерген пӱтынь тӱня мучко палдараш, районышто туризмым вияҥдаш йӧным ыштышаш». Тыланымашым ойлымеке, сету ӱдырамаш, идалык мучко кинде перкан лияш манын, Р. Ишмакаевлан вӱдылкаш пӱтырымӧ киндым да Обиница илемын мерже деч кайык сынан серлагышым пӧлеклен.

Башкортостан Республикын кугурак картше Геннадий Пастиев Рустам Адгатовичлан да пӱтынь районлан сурт ден кундемым аралыше серлагышым кучыктен.

Мишкан сельсовет СП администраций вуйлатыше Рустам Ишмакаев уна-влаклан чылаштланат тау мутым ойлен да ӱшаныштым чыла шотыштат шукташ сӧрен.

Финн-угор тӱнян культурный столицыжым почмашым кум йылме дене Р. Плотников, Р. Исмагилова да И. Аликаева вӱденыт.

Торжественный ужаш деч вара пресс-конференций эртен. Тушто тўрлє йодышлан вашмутым Р. Ишмакаев, А. Васильев, Р. Хырн, И. Евсеев, И. Султанмуратов, Ю. Герасимова, марий карт В. Головин, Удмурт Республикысе Шаркан районысо Тошто Быги селасе одо культура рӱдер директор Ж. Ермолаева пуэныт.

Финн-угор тӱнян культурный столицыжым почмаш деч вара пайрем концерт эртен. Тушто Мишкан районысо да моло кундемла гыч толшо творческий коллектив-влак усталыкыштым ончыктеныт. А ӱжмӧ уна-влак районысо икмыняр ялышке Шорыкйол пайремым палемдаш каеныт. Пайрем иканаште вич ялыште эртаралтын: Ирсайыште, Йылышыште, Озеркаште, Кӱрзеште да Монарыште. Шорыкйол моткоч йомартле пайрем, сандене чыла вереат пайрем шӱлыш озаланен да ӱстел-влак тӱрлӧ сийлан поян лийыныт. Уна-влак дене пырля гид семын Мишкан ЦБС-ын пашаеҥже-влак Д. Аликаева, О. Зайнитдинова, Л. Арсентьева, Л. Яхина да Е. Кубашева коштыныт. Пайрем уна-влаклан кужу жаплан шарнымашеш кодшо манын, культура пашаеҥ-влак И. Янситова, О. Михайлова, С. Ишмурзина, И. Шамукаева да Е. Асмаева тыршеныт.

Юзо кайык Мишкан кундемыш толмо лўмеш мероприятий Мишкан селасе РДК ончылно эртыше этнодискотека дене пытен.

Татьяна ГОРДЕЕВА.