Волгалт, чолга шӱдыр!

Волгалт, чолга шӱдыр!

«Башкортостанын талантше-влак» VII йоча да самырык-влакын творчествышт конкурс шеҥгелан кодын.

Конкурс Уфа олаште 29 февраль гыч 3 март марте эртен да самырык талант-влакым муаш, нунылан вияҥаш полшаш, коллектив да нуным вуйлатыше-влак коклаште кылым пеҥгыдемдаш, калык культурым аралаш да вияҥдаш виктаралтын. Жюришке Башкортостан Республикын да пӱтынь Российын культура да искусство шотышто лӱмлӧ специалистше-влак пуреныт. Конкурсышто сеҥыше-влакым «Инструментальный жанр», «Художественное слово», «Хореография» да «Вокал» номинаций-влак почеш рашемденыт.

Кугешнен каласыме шуэш – гран-прим налше-влак коклашке мемнан землякна - самырык, но уже кумдан палыме 14 ияш Лина Саетгарееват логалын. Ӱдырын талантше моткоч кугу, тудо мемнан чолга шӱдырна улеш. Линан ныжыл йӱкшӧ конкурсный программым чынжымак сӧрастарен, жюринат, тыглай ончышо-влакынат кумылыштым савырен. Ӱдыр «Вокал» номинацийыште гран-прим сеҥен налын. Палдарена: Лина Саетгареева Valova Musik Studio вокальный школышто усталыкшым пӱсемда.

- Конкурс – куштылго огыл текшырымаш, - ойла Лина, - но тудо у чонжишмашым пӧлекла, у йолташ-влакым муаш полша, у шинчымашым пуа. Тиде награда кумылем нӧлталын, мый шкемын туныктышем-влаклан – Лилия Арслановалан, Кристина Ильтимировалан да Юлия Валовалан чон гыч лекше тау мутым ойлем.

Тиде мемнан чумыр сеҥымашна! Ме Линам тиде сеҥымашыж дене алал кумылын саламлена да эшеат кугурак сеҥымашыш шуаш

тыланена.

Фирдаус КАДИКОВА.