Телым ужатеныт, шошым вашлийыныт

Телым ужатеныт, шошым вашлийыныт

Весела сем, шокшо мелна, шашлык там йырым-ваш шарленыт, еҥ-влакым пайрем эртыме верышке ӱжыныт. Ял калык чумыр еш дене телым ужаташ лектын.

Пайрем сельский поселений вуйлатыше С. Сергеевын саламлымашыж дене почылтын. Телым ужатыме, шошым вашлийме пайрем дене ял калыкым саламлаш район администраций вуйлатыше П. Трапезников ден район Советын секретарьже Т. Коледина толыныт.

Пайремым организоватлыше-влак тӱҥалтыш гыч мучаш марте еҥ-влакым веселитленыт, тўрлє модмаш-влакым эртареныт, мурыктеныт, куштыктеныт. Икманаш, пайрем шўлышым пуртеныт. Ты пайремым эртараш пєлекым да сертификат-влакым верысе предприниматель-влак Л. Минилбаева, Д. Ибраев, В. Байназов, Т. Сунюкова, Д. Иванова, В. Тримин пуэныт.

Пайремыш толшо калыкым шке выступленийышт дене «Вӱд толкын» (Пӱнчер ял), «Соказа сем» (Кугу Соказа ял) ансамбль-влак сєрастареныт. Тыгак Культура пєртын пашаеҥже-влак Анастасия Апекова, Анастасия Иванова, «Канде кава» группын солистше Сергей Байназов Алексей эргыж дене еҥ-влакым куандареныт.

Йоча-влаклан школ оралтыште Пӱнчер ялысе «Поро шӱман» волонтер-влак тӱрлӧ конкурс ден модмашлам эртареныт. Спортзалыште волейбол дене турнир эртен.

Моторын кычкыман имне-влак урем мучко йоча-влакым кондыштареныт.

Телым ужатыме пайремын ик тӱҥ символжылан Куштыра кувам йӱлатымаш шотлалтеш. Вет Куштыра кува дене пырля илышыште улшо чыла удаже йўла, лач порыжо, волгыдыжо веле кодеш.

Пайрем мучко еҥ-влак шокшо чайым тамле мелна дене йўыныт, моло сий дене сийлалтыныт. Пайремым кужу кандырам пунен куштымаш иктешлен.

Тыгай весела пайремым эртарыше организатор-влаклан кугу тау!

А. ТИМИРКАЕВА.