Шорыкйол пайрем дене!

Шорыкйол пайрем дене!

Нине саламлымаш-влак чыла чын лийыт. Калык календарь дене келшышын, У ий пайрем деч вара марий-влак Шорыкйол пайремым пайремлат. Пайрем молан Шорыкйол манылтеш чылан палат гын, Шочйол лӱмжӧ южылан палыдыме улеш. «Шоч» - шочшо, «йол, йолу» - эстон, финн да моло финно-угор калыкын «ий» мутым ончыкта, тыге «шочшо ий» лиеш.

Тиде жаплан пел телыже эртен каен шотлалтеш. Калыкын ойлымыж почеш, тиде жапыште маска вынемыштыже савырнен возеш.

Тыгай пайрем мемнан ялыштынат лие. Мӱндыр Эстоний да Удмуртий гыч толшо-влак пайремыштына пагалыме уна лийыч. Нуно Мишкан кундемыш финн-угор тӱнян культурный столицыжым почмашке толын улыт.

Автобус уна-влак дене ял воктеке толын чарныш веле, верысе артист-влак ямле уна вашлийме мурым шергылтарышт. Тамле мелна да шоҥешталт шинчыше пура марий-влакын эн чесле кочкыш-йӱышлан шотлалтеш. Уна-влак тудым куанен тамлышт.

Кандырам пунен кушташат чылан рӱж ушнышт. Вара чылан пырля урем мучко кид кучалын, мурым шергылтарен палемдыме суртыш тарванышт. Тыгай суртлан Михайловмыт ешын пӧртшым ойыралтын. Снежана ден Володя шукерте огыл кок пачашан чапле пєртым ыштен, кугу еш дене илат: авашт да вич йоча. Суртоза Володя Андреевич тӱня мучко палыме спортсмен Кирилл Михайловын изаже улеш. Снежана ден Володя Михайловмыт пеш пагалыме еш: мураш-кушташат, кидпаша денат эре ончылно. Нуно шукерте огыл йоча пӧрт гыч изи эргым шке ешышкышт ончаш налыныт. Суртоза-влак унам вашлияш поян ӱстелым погеныт. Кочкын-йӱын, мурен-куштымо жапыште суртышко Васли кугыза да Васли кува, салтак да моло Шорыкйол пайремысе еҥ-влак толын пурышт. Нуно озавате-влакын кидпашаштым ончен аклышт, ий могайрак лиеш, кєлан мом тений вучыман - чыла раш ойлен

каласкалышт. Марий калык модыш дене модашат жапым муыч.

Мӱндыр уна-влаклан тиде чыла пеш келшыш. Нуно марла мурен–куштымашкат, модмашкат ушнышт, шкеныштын муро да

куштымашыштым ончыктышт. Васли кува варажым уремышке лекташ йодо. Туштат весела пайрем умбакыже шуйныш…

Кас рӱмбалгымешке веселитлен, Васли кува ден Васли кугыза да нунын йолташышт-влак имне терыш шинчын, вес вере кудальыч. Мӱндыр вер гыч толшо уна-влакат каяш тарванышт. Унам ужатыме мурым мурен-куштен, икте-весын телефон номер-влак дене вашталтылын, фотокарточкылан войзалтын, Монар калык нунын дене шокшын чеверласыш.

Ирина ЗАХАРОВА.