Шокталте гармонь, шокталте!

Шокталте гармонь, шокталте!

Ты пайремын организаторжо Ардаш ялын ик чолга рвезыже Володя Хамитов. Тудын тӱҥалмыж почеш тений тудо шымше гана эртаралтын, ончычсо ийлаште Ардаш ял воктене эртен гын, тений у верыште - У Эшым воктене тудым эртарыме.

У верым ойырен налаш - куштылго паша огыл. Тидлан тушко пураш корно, еҥ-влаклан каналташ чыла шотыштат келшыше вер лийшаш. Ты пашам тений 10 майыште тӱҥалме. Лач ты кечын пайремым эртарыме верыште икымше гана субботник эртен. Ты кечын лишнак Шелык кумалтыш верым почмо. Тидланже лӱмынак марий мушан Эсен Элай миен. Кумалтышлан верым ойырымо деч вара еҥ-влак рӱжге тӱзатыме пашашке ушненыт. Ик тылзе жапыште, пайрем 13 июньышто эртен, верысе чолга еҥ-влакын вийышт дене пеш

шуко пашам ыштыме: воктене памаш-влакым эрыктыме, эҥер серым тӱзатыме, кӱварым олмыктымо, машина-влаклан пураш

корным ыштыме, памаш да эҥер деке кузе каяш кӱлмым ончыктышо знак-влакым шогалтыме, эҥерым пӱялыме, сценым ыштыме,

теҥгыл-влакым вераҥдыме.

Пайремыш Татарстан, Удмуртий, Марий Эл республикыла гыч, Санкт-Петербург, Москва олала гыч, Башкортостан Республикысе

Краснокам, Калтаса, Пӱрӧ, Мишкан районла гыч уста гармонист да художественный самодеятельный коллектив-влак толыныт.

Пайрем мероприятий Ардаш Культура пӧртыштӧ тӱҥалын. Пайремыш толшо уна-влак эн ончычак тушко чумыргеныт. Вара чылан пырля погынен, У Эшым ял деке тарваненыт. А тушто ты пагытлан еҥ-влак моткоч шукын погыненыт, амалкалче-влак (предприниматель) шке сатуштым ужалаш луктыныт. Игечыжат пеш келшыше лийын, кӱшыч кече шыратен ончен, леве мардеж шыман пуалын. Тышке йыр кундемысе ялла гыч уста музиканче-влакым ончаш, муралташ да кушталташ кумылан еҥ-влак шукын толыныт.

Тиде пайрем дене саламлаш район администраций вуйлатыше П. Трапезников, муниципальный район совет секретарь Т. Коледина, Ардаш сельсовет СП вуйлатыше Б. Байбулатов миеныт.

- Пайремым эртарыме верлан ты ялым арам огыл ойырен налме. Мемнан дене тыгай мероприятий-влак марий-влакын тӱшкан

илыме кундемлаште эртат, а изи ял-влак эре ӧрдыжеш кодыт.

Сандене нуным мондыдымашын, районыштына тыгай ял улмымат шарныктарыше мероприятий таче пеш кӱлешан, - манеш пайремын организаторжо, «Акарт» ансамбльын вуйлатышыже Владимир Ильич Хамитов. - Ты пайремым эртараш шонымо нерген мутым лукмеке, район администраций, сельский поселений тушко кумылын ушненыт. Ӱшанен кодам, ончыкыжым тыгай фестивальым эртарымаш поро йӱлашке савырна.

Теве икте почеш весе сценышке музиканче-влак лектыт. Музиканче-влакын шоктымышт почеш, сцена ончылно еҥ-влак чарныде

кандырам пуненыт, муро йӱк торашке шергылтын.

Ты пайремыште Калтаса район Амзибаш ял гыч 7 ияш гармонист Иван Петряев ден Марий Эл Звенигово район гыч Изи Карина (Ватютова) еҥ-влакын кумылыштым шке векышт савыреныт. Изи Карина тӱрлӧ кӱкшытан конкурслаште куд гана лауреат, 16 гана дипломант лийын. Диана Гурцкаян проектыштыже международный Московский фестивальыште Гран-Прим налын.

Пайрем иктешлалтын. Участник-влаклан дипломым, шарнымаш знак ден приз-влакым кучыктымо.

Тиде кече толшо кажне еҥын чонешыже кужу жаплан шарнаш кодеш. Тудо гармонист-влаклан эше ик гана шке мастарлыкыштым

ончыкташ йӧным пуэн, а пайрем ончаш толшо-влаклан чонышт канымешке, йолышт нойымешке, йӱкышт оралгымешке кушташ да

мураш амалым ыштен.

Венера АГЛЯМОВА.