Шочмо йылме ок мондалт

Шочмо йылме ок мондалт

Регион кӱкшытыштӧ шочмо йылме да литератур дене оимпиаде кумшо ий почела Уфа олаште К. А. Давлеткильдеев лӱмеш гимназий-интернатыште эртен. Олимпиаде кум этап гыч шоген: 1 тур – викторине, 2 – сочинений, 3 – диалог.

Олимпиадыш чылаже 43 заявкым пуымо, 41 толын: 8 класс - 11 тунемше, 9 класс – 14, 10 класс – 6, 11 класс – 10. Олимпиадын географийжым ончалаш гын, тудо 11 районым авалтен. Мишкан район гыч 14 йоча толын, Пӱрӧ район гыч – 6, Калтаса район гыч – 3, Краснокам район гыч – 7, Белебей, Шаран да Бакале районла гыч ик йоча дене, Бурай, Янаул, Дӧртыльӧ, Илиш районла гыч - 2 йоча. Муниципальный да региональный этаплан заданий-влакым Марий Эл республикысе образований министерстве гыч колтеныт. Тунемше-влакын пашаштым жюри председатель, филологий наука кандидат, БГУ-н Пӱрӧ филиалжын доцентше, С. И. Апсатарова, филологий наука кандидат, БГУ-н Пӱрӧ филиалжын доцентше А. А. Илиева, Благовещенск оласе шуко профилян профессиональный колледжыште туныктышо И. Г. Тойгильдина тергеныт. Моло ий дене танастарымаште, тунемше-влакын паша лектышышт койынак сай могырыш вашталтын. Туныктымо шагат чот иземын гынат, тунемшын да туныктышын пырля тыршымышт шижылтеш.

Класс йотын (8-11) сеҥыше-влак чыланат Мишкан район гыч улыт: Я. Сайпашева (Тымбай ялысе школ, туныктышо Минаева Н. П.), А. Миксонова (Чорай ялысе марий гимназий, туныктышо А. Л. Юзукбаева), А. Тимиркаева (Чорай ялысе гимназий, туныктышо А. Л. Юзукбаева), А. Николаева (Тымбай ялысе школ, туныктышо Н. П. Минаева). Сеҥыше-влакым палемдыме лӱмеш торжественный церемонийыште «Ош кече» марий калыкын материальный огыл культура поянлыкшым аралыме да вияҥдыме шотышто фондын президентше Виталий Федорович Головин нуным чылаштымат планшетный компьютер дене палемден.

Тиддеч посна 13 призёр лийын. Каласаш кӱлеш, 50 процент чекым чыла тунемше эртен.

Йоча-влаклан шочмо йылме дене олимпиадыште кумылын участвоватлымыштлан, туныктышо-влаклан нуным сайын туныктымыштлан, организатор-влаклан конкурсым сайын эртарымыштлан, спонсор-влаклан - «Ош кече» фонд вуйлатыше В. Ф. Головинлан, марий мер пашаеҥ В. Г. Ялаевлан, шочмо йылмым туныктымо шотышто методист А. С. Килинбаевалан, марий историй да культура рӱдерын тӱҥ методистше А. В. Ибулаевлан да ӧрдыжеш коддымо марий шўлышан моло поро йолташна-влаклан чон гыч лекше тау мутым ойлена.

И. ТОЙГИЛЬДИНА.