+13 °С
Облачно
Культура
31 Декабря 2020, 21:00
Озерка ял Морко район гыч уна-влакым вашлийын
Финн-угор тӱнян тӱвыра рӱдерже пайрем программа кышкарыште уна-влакым вашлийше ик ялже Озерка лийын.
Озерка ял Морко район гыч уна-влакым вашлийын
Марий Элысе Морко район Шоруньжа ял гыч толшо делегаций Мишканыште тӱвыра рӱдерын символжым Мишканлан торжественный обстановкышто пуымеке, Озерка ялыш «Шорыкйол» пайремым эртараш миен. Ялыш пурымаште мекетерым кичкыман оҥгыран имне-влак дене вашлийыныт. Уна-влакым имньыш шынден, Хайретдиновмыт суртыш наҥгаеныт.
«Шорыкйол» - марий калыкын ик эн йӧратыме, весела пайремже. Тыште поян чес, муро, куштымаш, мужедмаш да савлай-влак лийыныт.
Мужедмаш уремыште эртен. Ӱдыр-влак капка гоч портышкемым кышкеныт, вичаште шорык- йолым кученыт. Кажне мужедмашын шке палыже уло. Портышкемым кышкен, могай велыш марлан кайышашым рашемденыт, а шорык- йолым кучен, ошалге, шемалге, илалше але самырык качылан марлан лекшашым паленыт. А каза йол логалеш гын, вес калыкын шочшыжлан марлан лекташ логалеш, маныныт.
Т. ГОРДЕЕВА.
