«Мутланал мый денем, шӱдырем»

«Мутланал мый денем, шӱдырем»

19 мартыште Мишкан краеведческий библиотекыште книган презентацийже эртен.

Светлана Ивановна Салиева (Айметова) 1950 ий 18 мартыште Укозаш ялыште Иван Васильевич ден Янипа Ямаевна Айметовмыт ешыште шочын. Ачаже Кугу Отечественный сарын участникше лийын, моткоч кӱчык ӱмырым илен. 1953 ийыште, 32 ияшак нелын черланен колен. 28 ияш ватыже кок изи ӱдыр дене кодын. 1957 ийыште Светлана Айбылат ялысе школыш 1 классыш тунемаш каен. Икымше туныктышыжо Чорай ял гыч кумдан палыме спортсмен Денис Тимиркаевич Тимиркаев лийын. 1965 ийыште, школым тунем пытарымеке, Благовещенский педучилищыш пурен. Педучилище деч вара шочмо районышкыжо толын да Ирсай кандашияш школышто тӱҥалтыш класслаште пашам ышташ тӱҥалын. 1969 ий гыч 1972 ий марте ты школышто ыштен. Тиде жапыште йоча-влак дене пашам ышташ кӱчык почеламут-влакым шке возаш тӱҥалын. 1973 ийыште комсомол путевка дене Ростов-на-Дону олашке, Россельмаш заводыш пашаш каен. 1973 ий август гыч 1976 ий март марте комбайн-влакым погымо цехыште механосборочный пашан слесарьжылан ыштен. 1976 ийыште уэш Мишканыш пӧртылын, Росгосстрахыште экономистлан ышташ тӱҥалын. Тыште тудо 13 ий ыштен. Вара школыш пӧртылын. 1990 ий гыч 2000 ий марте 1 №-ан Мишкан кыдалаш школышто тӱҥалтыш класслаште туныктышылан ыштен. 1998 ийыште Йошкар-Олаште «Мишкан - мыйын шулдыр» книга савыкталт лектын. Тиде книгашке Мишкан районышто илыше автор-влакын возымыштым пуртымо. Светлана Ивановнан почеламутшо-влакат тушко логалыныт.

2000 -2010 ийлаште Мишкан РДК-н музей отделжым вуйлатен. 2010 ий май тылзе гыч Светлана Ивановна сулен налме канышыште улеш. Яра жапыштыже почеламутым, мурым возгалаш йєрата. «Мишкан сем» ветеран-влак ансамбльыште мура.

Светлана Ивановна - муро чонан айдеме, сандене шке почеламутшо-влак- лан семым келыштара. Тыге «О, Мишкан», «Колыбельная внуку», «Шочмо вер» да моло муро-влак шочыныт. Шке мурыжо-влакым шкеак мура. Пытартыш жапыште С. Каншаева, «Ӱжара» да «Мишкан сем» ансамбль-влакын репертуарыштышт тудын мурыжо-влак улыт.

Светлана Ивановна ден Алик пелашыже кок эргым ончен-куштеныт - Станислав ден Денис. Коча ден кувавам кум уныка - Сережа, Ваня да Анечка куандарат.

С. Салиеван почеламутшо-влак «Келшымаш», «Чолман» газетлаште савыкталтыт. Светлана Ивановна 2019 ийыште «Время творить» республиканский проектын финалистше лийын. Республикысе ветеран-влак организацийын Тауштыме серышыж дене палемдалтын.

Книга презентацийыште библиотекарь-влак И. Айбердина ден О. Зайнитдинова С. Салиеван илышыже да творчествыже дене палдареныт. Юбилярым район администраций вуйлатышын социальный йодыш шотышто заместительже Л. Александрова, районысо ветеран-влак советын председательже Ю. Балахнина саламленыт. Светлана Ивановна шке возымо почеламутшо-влакым лудын, тудым тургыжландарыше тема-влакым почаш тыршымыже нерген, шочмо пўртўс, еш, лишыл е‰-влакын кумылаҥден шогымышт нерген ойлен.

«МуроЭм», «Мишкан сем», «Ӱжара» ансамбль-влак, Мишкан РДК-н хоржо, С. Каншаева, А. Ибулаев, Т. Исадыкова Светлана Ивановнан возымо мурыжо-влакым йоҥгалтареныт.

Поэтессылан муро пӧлекым Станислав ден Денис эргыже-влак, Сергей уныкаж ден Регина шешкыже ыштеныт.

Самодеятельный авторым Р. Ялаева, М. Гареева, Н. Ишалина, шочшыжо-влак - Нина ден Андриян Изиляевмыт, Геннадий ден Вера Изибаевмыт, Лиза Баширова да молат саламленыт. Светлана Ивановналан ончычсо тунемшыже-влак лӱм дене Василий Пашкинын саламлымашыже моткоч вучыдымо да куанле лийын. Дмитрий Ямаев поэтессам Денис шольыжо лӱм дене саламлен.

Мероприятий мучаште Светлана Ивановна шке книгажым автограф дене йолташыже-влаклан, краеведческий библиотекылан пєлеклен.

Краеведческий библиотекын коллективше Светлана Ивановнам чапле юбилейже дене шокшын саламла, пеҥгыде тазалыкым, кужу ўмырым, творческий сеҥымашым тылана.

В. АГЛЯМОВА (материалым краеведческий библиотек пуэн).

Пӧлек

Таче мыйын чапле, лўман кече,

Палемдем туге, кузе шонем.

Ойырен муам тугай пӧлекым,

Лийже веле чонемлан пайрем.

Шоналтем - шындем мый самоварым,

Кўэштам мелнам, унам ўжам.

Шоналтем - лектам чонемын садыш,

Шўшпык-таҥлан кумылем почам.

Шўдыр-йолташемже пеш ӧреш дыр,

Эр, касат кава гыч эскерен.

Олык лапыште пеледышым погалын,

Шкаланем букетым кучыктем.

Я куржам лыжга куэ воктеке,

Туйысемым снеге ден темем.

Юзо там - пўртўсын кӧстенеч ден

Шкемым шкеак шер теммеш сийлем.

Чонемланже трук йокрок лиеш гын,

Поэзий лукышкет пурен шинчам.

Шўм-чонем пудыратылше амалжым,

Тунамак тушеч кожен луктам.

Кумда илыш корным тўржӧ дене

Ошкылаш тӧчен чолган, лўдде,

Тўрлыжым шўмем чыташ тунемын…

Шкаланем ўшан, мутат уке.

Эрыкан чонемже, кайык семын,

Шке корнемым шкеак виктарем.

Нигӧ деч ом вучо мый пӧлекым,

Шкаланем мый шкеак пӧлеклем.

Светлана САЛИЕВА.