Кӱрзе ял калык уна-влакым вашлийын

Кӱрзе ял калык уна-влакым вашлийын

Финн-угор тӱнян тӱвыра рӱдержым почмо мероприятий деч вара Мишкан РДК-ште кугу пайрем концерт эртен. Сандене уна-влак «Шорыкйол» пайремыш ончылгоч палемдыме жап деч варашрак кодын миеныт. Но тидын дене пайрем локтылалтын огыл…

Нуриман, Калтаса да Бурай районла гыч толшо уна-влакым Кӱрзе ял калык шокшо мелна да пура дене сийлен, пайрем йӱла муро-влакым мурен вашлийыныт. Вара чылаштым Саляевмыт суртыш унала ӱжыныт. Шорыкйол годым пайрем ӱстелын поянлыкше ден идалыкын могай лийшашыже кылдалтын маныт. А тиде суртышто погымо ӱстелым ончен, идалык моткоч поян лийшаш. Могай гына сий лийын огыл, эсогыл шукертак мондалтше полтымат шолтеныт.

Марий-влакын кеч-могай пайремыштат муро да куштымаш дене кылдалтын. Кажне пайремын шке мурыжо, йӱлаже уло. Сурт озалан полышкалаш толшо ӱдыр-влак моткоч сылне куштымаш дене уна-влакым куандареныт. Пайремыш толшо ял калык кертмыж семын унам вашлийше сурт оза-влаклан полышкален, да, конешне, шкежат уна лийын.

Савлай-влакат (Васлий кува-кугыза-влак) яра кид дене толын огытыл, тӱрлӧ кӧстенечым конденыт. Нуно сурт оза-влаклан тазалыкым, кужу ӱмырым, пиалан илышым, сурт вольыклан ӧрчаш, пакчаште поян урожайым погаш тыланеныт. Тыште чылажат иктыш ушнен - сий, муро, куштымаш… Ожно «Шорыкйол» пайремым кузе эртарымым шарналтеныт, а ӱдыр-влак ончыкылык пелашышт кӧ лийшашым мужедыныт.

«Шорыкйол» пайрем тӱрлӧ модмаш-влак дене кылдалтын. Кӱрзе ялысе ӱдыр-рвезе-влак уна-влаклан ятыр модышым ончыктеныт. А кандырам кушташ тӱҥалмеке, ик еҥат верыште шоген сеҥен огыл, куштен моштышыжат, моштыдымыжат кандырам пунаш ушнен.

Вара уна-влакым уэш ӱстелтӧрыш ӱжыныт, шокшо чай, мелна дене сийленыт. Ты сурт дене чеверласымеке, уна-влак пошкудо суртлашке пуреныт.

Кӱрзе ялыште ончыктымо «Шорыкйол» пайрем йӱлам вес районла гыч толшо уна-влак, тӱҥ шотышто культура пашаеҥ-влак лийыныт, шке пашаштышт кучылташ сєреныт. Чеверласыме годым уна-влак шке мурыштым муреныт, а Нуриман район гыч толшо еш ансамбль куштымашым ончыктен.

Татьяна ГОРДЕЕВА.