Чонлан волгыдо да лайык!

Чонлан волгыдо да лайык!

Тиде пайрем уже нылымше ий эрта, фестивальышке идалык еда районысо куштышо коллектив-влак веле огыл, тӱрлӧ кундемла гычат толыт: Калтаса, Нуриман, Благовещенск, Краснокам да моло районла ден тӱрлӧ олала гыч. Теният тыгак лийын, фестивальыште

чылаже тӱжем утла еҥ участвоватлен. Уна-влак Благовещенск, Нефтекамск олала, Татарстан, Удмуртий да моло кундемла гыч толыныт. Южо коллективше сценышке пыкше гына шыҥен.

Тынар унам сайын вашлийшашлан Кугу Соказа сельсовет сельский поселений ден верысе культура пашаеҥ-влаклан ятыр вийым пыштыман. Но нуно чыла нелылыкым сеҥат да идалык еда пайремым сай кӱкшытыштӧ эртарат.

Куштызо-влакым лӱмлӧ еҥ-влак гыч шогышо жюри аклен. Тушко БР-н сулло артистше А. Байгазов, БР культурын сулло пашаеҥже В. Сагадеев пуреныт. Жюрин председательже РФ да БР культурын сулло пашаеҥже Я. Янгубаев лийын. Нунылан эн сай коллективым ойырен налаш моткоч неле лийын. Вет фестивальын участникше-влак чыланат шедевр деке лишемше номер-влакым ончыктеныт. Кажне номер деч вара калык совым рӱж кырен. А куштымаш годым, эсогыл, кушташ тӱҥалше-влакат лийыныт.

Пайрем деч ончыч фестивальын участникше ден уна-влакым алал кумылын Мишкан район МР администраций вуйлатыше П. Трапезников саламлен. Павел Владимирович фестивальын ий гыч ийыш кугеммыжым, географийже шарлымым палемден. Ончылгоч каласыме шуэш, фестивальыште сай могырчын Нефтекамск оласе «Келшымаш» калык куштымаш ансамбль (Н. Садретдинов вуйлата), Благовещенск оласе «Оҥгырйӱк» марий фольклор ансамбль (В. Аптыкаев), Кугу Соказа ялысе «Ош пеледыш» куштышо коллектив (А. Апекова), Йылыш гыч куштышо дуэт (Е. Алексеева), Пӱнчер ялысе «Юго» куштышо коллектив (А. Иванов), Монар ялысе «Ший памаш» фольклор калык ансамбль (А. Султанбаева), Нуриман район гыч «Ӱжара» йоча коллектив (В. Асеев), Пӱнчер гыч «Вӱд толкын» куштышо ӱдырамаш ансамбль (А. Иванов), Арзамат ялысе куштышо коллектив (Т. Байгазова). Ончышо-влакын кумылыштым «Ленде

шудер» куштымаш дене Пӧкленде ялын куштышо коллективше (Л. Кутлукаева) савырен, Пӱнчер ялысе «Юго» коллективат моткоч уста улмыштым ончыктен.

Икманаш, сценыште чолгалык ден усталык озаланеныт. Но кеч-могай сылне пайремат кунам-гынат пыта. Иктешлымашым ышташат жап шуын. Каҥашымаш деч вара сеҥыше-влакым увертарыме. «Кугу ансамбль» номинацийыште икымше верым «Юго» Пӱнчер ялысе куштышо калык ансамбльлан пуымо, кокымшым – «Рвезылык» (Тынбай) коллективлан, кумшым – Благовещенск оласе «Оҥгырйӱк» фольклор ансамбльлан.

«Изи ансамбль» номинацийыште «Ош пеледыш» (Кугу Соказа) куштышо коллектив сеҥен, Монар ялысе «Ший памаш» фольклор коллектив кокымшо лийын, Нуриман районысо «Ӱжара» куштышо коллектив - кумшо.

«Дуэт» номинацийыште икымше верым Йылыш ялысе дуэт (Е. Алексеева) налын, Нуриман районысо «Ӱжара» дуэт кокымшо лийын, кумшо верымат тиде районысо дуэтланак пуымо.

Фестивальын тӱҥ призшым тений Нефтекамск оласе «Келшымаш» куштышо калык ансамбль налын. Тиде ансамбль республикыште веле огыл, пӱтынь Российыште кумдан палыме улеш. Куштызо-влак тӱрлӧ калык куштымашым куштат. Тӱҥ призым нуно чынжымак сулен налыныт. Ансамбль вуйлатыше Н. Н. Садретдинов тидын верч ятыр пашам ыштен.

Фестиваль шеҥгелан кодо. Кӱчык каныш деч вара коллектив-влак Пӱнчер мланде дене чеверласеныт да автобусыш шинчыныт. Тыште куштызо-влак эше ик гана ожсо йолташыштым ужыныт але у йолташым муыныт. Кажне еҥын чоныштыжо волгыдо да лайык лийын. Мӧҥгеш чыланат алал кумылын каеныт.

Вениамин КОНДОГИН.