«Яндар йӱк-2020»

Финн-угор йылмыла дене мурышо самырык мурызо-влак виш конкурс иктешлалтын

«Яндар йӱк-2020»

Мероприятий «Мишкан – финн-угор тӱнян рӱдыжӧ-2020» проект кышкарыште эртен. Эпидемиологический обстановка лӱдыкшӧ улмылан кӧра конкурс дистанционно эртен – участник-влак жюрилан тергаш видеозапись-влакым колтеныт.

«Яндар йӱк-2020» конкурсышто Марий Эл, Башкортостан Республикла, Виче кундем (Киров область) гыч 18 мурызо вийжым терген. 15-25 ияш-влак коклаште 12 еҥ усталыкшым терген, 25-35 ияш-влак коклаште – 6 еҥ.

Конкурсант-влакым кӱкшӧ квалификациян жюри аклен. Тушко пуреныт: Нафира Назмутдиновна Иксанова (Бабичева) – БР искусствын заслуженный пашаеҥже, «Мирас» фольклор ансамбльын художественный вуйлатышыже (жюри председатель); Наталья Михайловна Кондакова – БР РЦНТ-н хоровой жанр шотышто вӱдышӧ специалистше; Раисия Ивановна Исенбаева - Нефтекамск оласе государственный филармонийын солистше; Надежда Валерьевна Иванова – ДШИ педагог, «Ладушки» образцовый вокальный ансамбль вуйлатыше.

Жюри конкурсант-влакын исполнительный усталыкыштым, оҥайлыкыштым, фонограммын качествыжым, аранжировкым, выступленийын оформленийжым акленыт.

Иктешлымаш деч вара Гран-прим Янаул оласе мурызо Ольга Николаевалан пуымо (снимкыште).

Икымше степенян лауреат лўмым Виктория Мочалова (Марий Эл, Оршанке район) ден Кристина Русиева (Пошкырт кундем, Калтаса район) нылыныт.

Кокымшо степенян лауреат лӱмым - Николай Сидоров (Марий Эл, Морко район), Анастасия Иванова (Пошкырт кундем, Мишкан район), Анастасия Апекова (Пошкырт кундем, Мишкан район), Руслан Капитонов (Марий Эл, Курык марий район).

Дарья Лебедева (Марий Эл, Сернур район), Анжелика Салимянова (Пошкырт кундем, Нефтекамск ола), Диана Николаева (Марий Эл, Медведево район) кумшо степенян лауреат лийыныт.

Икымше степенян диплом дене Сандре Шамаевам (Пошкырт кундем, Мишкан район) палемдыме, кокымшо степенян диплом дене – Кирилл Толстухиным (Виче кундем, Яранск ола), кумшо степенян диплом дене – Виктория Шамыковам (Пошкырт кундем, Пӱрӧ ола).

«Авторский муро» номинацийыште посна приз дене Анастасия Питаева (Пошкырт кундем, Нуриман район) палемдалтын.

А. ГАЛИМОВА.