Илышым муро дене

Илышым муро дене

Пеледыш пайрем – марий калыкын ик эн йӧратыме пайремже. Тудлан 100 ий ончыч туныктышо, драматург Александр Фёдорович Конаков тӱҥалтышым ыштен. 1920 ий 27 майыште Шернурышто икымше гана Йошкар Пеледыш пайрем эртен.

Кумда элна мучко коронавирус инфекций шарлымылан кӧра молгунамсе семын тений Пеледыш пайрем шошо ага мучашлалтмеке огыл, а 1 октябрьыште Чарла кремльыште гӱжлен. Тушко марий-влакын тӱшкан илыме тӱрлӧ регион гыч да Марий Элын чыла гаяк районжо гыч участник, фольклор коллектив-влак погыненыт. Кажныже шке кундемысе мотор марий вургем дене волгалтын.

Пеледыш пайремыш чумыргышо-влакым эн ончычак марий онаеҥ-влак саламлышт. Тиддеч вара Марий Эл правительство председательын икымше алмаштышыже Михаил Васютин, Марий Элын Кугыжаныш Погынжын депутатше Лариса Яковлева, культура, печать да калык паша шотышто министрже Константин Иванов да молат саламленыт.

Мишкан район гыч тиде пайремыш Владимир Хамитовын вуйлатыме «Памаш» еш ансамбль Пӧкленде ялысе «Ленде» ансамбль дене пырля миен. «Памаш» еш ансамбль районный, республиканский да моло фестивальлаште чолган участвоватла да чӱчкыдын призовой верлашке лектеш.

- Ме «Пеледыш пайремыште» кугу кумылын участвоватленна, - ойла В. Хамитов. - Корно тора лийын гынат, нойымо шижылтын огыл. Мӧҥгешла, Йошкар-Олашке миен толмо кумылнам нӧлталын. Адакшым мыланна ты фестивальыште участвоватлымылан Тауштымашым кучыктеныт.

В. Хамитов вуйлатыме Ардаш Культура пєрт пеленсе «Акарт» ансамбльлан тений 15 ий темеш. Тиде жапыште нунын сондыкыштышт пеш шуко грамота ден диплом-влак чумыргеныт. Республикын кечыжым пайремлыме годым «Акарт» черетан наградым - «Мый йӧратем тыйым, илыш!» кугурак ийготан еҥ-влакын художественный самодеятельность республиканский фестивальыште II степенян дипломым налын.

Светлана ТОЙМУРЗИНА.