«Марий кандыра»

«Марий кандыра»

Татарстан Республикысе Менделеевский районышто тыгай лӱман этнофестиваль эртен

Элнет ялыште кумда ужар олыкышто Марий Эл, Удмуртий, Башкирий, Свердловск да Киров областьла, Татарийысе Мамадыш да моло районла гыч чылаже 19 коллектив погынен.

Нунын коклаште Ардаш ялысе Культура пєрт пеленсе «Акарт» фольклор ансамбльат (В. Хамитов вуйлата) лийын да сайын выступатлымыжлан диплом дене палемдалтын.

Пайрем саламлалтмаш, тўрлє марий кочкыш дене сийлымаш да йомартле муро-влак гыч тӱҥалын. Тылеч вара экскурсовод Ольга Боднарь Менделеевск илемын да «Марий кандыра» этнофестивальын историйышт дене палдарен.

«Кандыра» - эрвел марий калыкын тӱрлӧ йӱлам шуктымо дене кылдалтше куштымашыже. Тудо курым гыч курымыш аралалтын толеш да марий калыкым ушен шогышо вий улеш. Куштымаш ятыр курым ожно шочын. Тудо тӱрлӧ кундемлаште марий-влакым иктыш ушнымыштым да кугезе-влак дене кылым символизироватла. Калык ой почеш, «кандырам пунымаш» осал шӱлыш-влак дечынат арала. Тывырдатымаш тӱрлӧ чер ден осалымат лўдыкта. Ожно, тывырдатыме йўк кугырак лийже манын, йондал пундашышке кєтырмам але изи оҥгырым пижыктенат.

Фестивальыште куштымаш дене гына серлагыме огыл. Тушто тыгак тӱрлӧ калык кудо-влак лийыныт. Кажне коллектив шке вер-шӧрысӧ калык йӱлаж дене, вургемже, тӱрлӧ ӱзгарже дене палдарен. Пайрем олыкышто тыгак спорт площадке-влак пашам ыштеныт, тӱрлӧ выставка-влак верланеныт.

Пайрем деч конкурсант ден уна-влакым Менделеевский район МР администраций вуйлатыше Валерий Чершинцев саламлен. Тудо шкенжын шомакыштыже тыгай пайрем-влакын моткоч кӱлешан улмыштым палемден: «Тӱҥжӧ, тиде событий Менделеевский мландыште тӱрлӧ калык-влак коклаште келшымаш озаланымым рашемда. Таче «Марий кандыра» тыште тӱрлӧ кундемлаште илыше марий-влакым чумырен».

Пайрем мучаште чыла коллектив дене уло калык ик кугу «кандырам пуненыт». Тений Татарийысе Менделеевский районышто эртыше этнофестивальышке чылаже 1200 еҥ ушнен.

Материалым «Менделеевские новости» газет гыч налме.