Васюткинмыт тукым

Кажне еҥын илышыштыже еш, шочмо сурт да икшыве-влак тўҥ верым налын шогат. Шуко ешыште паша профессий тукым гыч тукымыш куснен толеш. Икманаш, могай-гынат пашам ыштымаш тукымын йўлашкыже савырна.
Районысо калык ожсек мланде пашам ыштен илен. Совет жапыштат колхо-влак кажне ялыште лийыныт. Кызыт илыш вашталтын. Но ял озанлык-влак шагал улыт гынат, вольыкым ончышо да шурным куштышо-влак эше улыт. Ик тыгай тукым – Васюткиным – Ардаш ялыште ила. Тиде тукымын чумыр паша стажше 140 утла ий.
Тукымлан негызым Айгавий Васюткиновна Васюткина пыштен, Юрий Иванович Васюткин – тудын эргыже, Нина Михайловна Васюткина – шешкыже, Сергей Юрьевич Васюткин – Айгавий Васюткиновнан уныкаже, Олеся Юрьевна Васюткина – Сергейын ватыже, Памир Сергеевич Васюткин – Сергей ден Олесян эргышт, Радик Юрьевич Васюткин ден Рудик Юрьевич Васюткин Айгавий Васюткиновнан уныкаже улыт.
Айгавий Васюткиновна 1919 ийыште шочын. Тудо ўмыржӧ мучко шочмо мландыштыже пашам ыштен. Мичурин лўмеш колхозышто изинек тыршаш тўҥалын. 18 ияшыж годым тракторыш шынденыт. Сар жапыште пашам тыршен да сайын ыштымыжлан 1947 ийыште «За доблестный и самоотверженный труд в годы Великой Отечественный войны 1941-1945 гг.» медаль дене палемдалтын. Айгавий Васюткиновна тыгак моло награде-влак денат палемдалтын: «Тридцать лет Победы в Великой Отечественной войне 1941-1945 гг.», «Сорок лет Победы в Великой Отечественной войне 1941-1945 гг.», «Пятьдесят лет Победы в Великой Отечественной войне 1941-1945 гг.» юбилейный медаль-влак дене. Юрий эргыже шочмо деч вара тудлан тракторист пашам кудалташ пернен, шала пашаеҥлан куснен. Икманаш, тўрлӧ пашам ыштен.
Юрий Иванович Васюткин Мичурин лўмеш колхозышто 16 ияшыж гычак ышташ тўҥалын. Механизатор лийын. Армий деч вара шочмо мландышкыже пєртылын, шочмо колхозыштыжо механизатор, механик лийын тыршен. 1978 ий майыште ончыкылык пелашыжым – Нина Михайловнам вашлийын. Самырык да мотор ўдыр тудын шўмжым виклан савырен. Ик жап гыч нуно мужыраҥыныт. Пырля куд икшывым ончен куштеныт: Сергейым, Ларисам, Арсенийым, Раисам, Рудикым, Радикым. Чылаштымат изинек пашам йєраташ, нелылык дечын лўдаш огыл туныктеныт. Нина Михайловна шкеже колхозышто доярке лийын 34 ий ыштен. Пашан ветеранже да поро ава улеш. 1987 ийыште «Медаль материнства» награде дене палемдалтын.
Сергей Юрьевич Васюткин «Васюткин С. Ю.» КФХ-м вуйлата. Тудлан изинек имне-влак келшеныт. Имне дене кошташ тудо, очыни, ойлаш тўҥалмыж деч ончыч тўҥалын.
«Васюткин С. Ю.» КФХ-ште шурным, пырчан-отызан культура-влакым, шукияш шудым куштат, имньым ончат. Паша ончычсо Мичурин лўмеш колхоз мландыште ышталтеш. Озанлыклан арендыш 1900 гектар мландым пуымо. Тушечын пасу 1110 гектарым айла. Ончыкыжым пасум кумдарташ планышт уло. Озанлыкыште 120 вуй имне ашналтеш, тушечын коло кумытшо – спортивный. Сергей Юрьевич имне спорт дене кылдалтше тўрлӧ мероприятийлаште участвоватла да призовой вер-влакым налеш. Сергей Юрьевич сай урлыкаш аргамак-влакым ончаш тў‰алаш изиж годымак кумылаын. Тунам тудо имньым ончаш ачажлан полшен.
Тўрлє пашам шукташ КФХ-ште 13 единице технике уло. Мутлан, шурным погымо комбайн, сакыме але шўдырен коштмо ял озанлык оборудований-влак (мульчер, косилка, тырма, плуг, культиватор).
Сергей Юрьевич БР-се Мишкан район МР V созыв советын (15 №-ан округ) депутатше улеш, депутат улмыж дене верысе калыклан шагал огыл пайдам конден. Мутлан, тудын тыршымыж дене Ардаш ялыш вўдым пуртымо. Идалык еда Ардаш ялысе школлан спорт инвентарьым (ече-влакым) налаш полша, тыгак снегоходым налме. Ардаш, Тӧҥгак, Эшым, Ваксола, Лепешкан ял уремлаште йоча площадке ден спорт площадке-влакым ыштыме. Сергей Юрьевичын ятыр наградыже, медальже да кубокшо улыт. Мутлан, агропромышленный комплексыште ятыр ий пашам ыштымыжлан, меш пашаш чолган ушнымыжлан, имне дене таҥасымаште призовой вер-влакым налмыжлан.
Сергей Юрьевичын эн кугу эҥертышыже – ешыже: Олеся Юрьевна пелашыже, Ангелина, Памир, Амалия икшывышт. Кодший тудо коча лийын. Олеся ден Памир кренсаньык (фермер) озанлыкын членже улыт, нуно ача-авашт дене пырля тыршат. Эргышт пашамат ышта, тунемешат, эше спорт дене кылым кучаш жапым муэш. Ознлыкыште тудо имньым онча, яра жапыштыже бокс дене заниматлалтеш, спорт мастерлан кандидат улеш. Сай сеҥымашыш шумыжлан БР-се бокс федерацийын грамотыж дене палемдалтын.
Ял озанлыкыште Сергей ден Олесян йыгыр эргышт-влак Радик ден Рудикат тыршат. Нуно «Центральный» МТС ГУ ГУСП-н Ардаш ялысе ушкал фермыштыже ыштат. Пашам сайын ыштымыштлан ик гана огыл, предприятийын, Мишкан район МР советын да администрацийын чап грамотышт дене палемдалтыныт.
Кугу огыл, но виян Васюткинмыт еш чолга да чулым улеш, нуно шочмо районым, шочмо вер-шўрыштым тўзатыме верч вийыштым огыт чамане. Ончыкылык тукымат тыгай лиймылан ўшан уло. Сандене пеҥгыдын каласен кертына – тукым да тудын пашаже умбакыже шуйнат!
Венера АГЛЯМОВА.