Кужу жап вучымо пӧлек

Районышто «Здравоохранений» национальный проект почеш чоҥымо тиде кумшо ФАП. Кум учрежденийжат медицинский полышым пуаш лицензийым налын.
Ӱлыл Памаш ялыште илыше-влаклан у модульный фельдшерско-акушерский пунктым почмаш кугу событийыш савырнен.
Коронавирус пандемий ончыктен, здравоохранений сферыште айдемын илышыж деч шерге нимо лийын ок керт. Конешнее, политика, экономика, мер илыш институт-влак деч поснат ок лий. Но кунам айдеме черлана, чыла нине умылымаш-влак шеҥгелан кодыт. Кызыт элыштына здравоохраненийым вияҥдыме шотышто тыгаяк лўман национальный проект кышкарыште шуко ышталтеш. Россий Президент Владимир Путин здравоохранений дене кылдалтше выступленийлаштыже тиде социальный отрасльын тўҥалтыш звеножым - ФАП ден поликлинник-влакым вияҥдышаш нерген ойла. Вет чер ваштареш кучедалмаште лач нуно ончыл радамыште шогат, калык коклаште профилактический пашам шуктат.
Кўрзе сельсоветысе Памаш ялыште у ФАП-ым почмаш У ий пайрем шўлышеш эртен. Тиде мероприятийыште район администраций да Кўрзе сельсовет СП администраций гыч представитель-влак, депутат-влак, ял калык лийыныт.
Памаш ялыште илыше-влакым у ФАП почылтмо дене Башкортостан Республик здравоохранений министр Айрат Рахматуллин, Мишкан район администраций вуйлатыше Павел Трапезников, Мишкан рўдӧ районный больницын тўҥ врачше Валерий Гареев саламленыт.
Мишкан район МР совет депутат Дмитрий Смирнов ял калыкым кужу жап вучымо тиде событий дене шокшын саламлен да пеҥгыде тазалыкым тыланен.
Кўрзе сельсовет сельский поселений вуйлатыше Юлия Андреева район администрацийлан, рўдӧ районный больницылан, чоҥышо подрядчик-влаклан тиде суапле пашам ыштымыштлан кугу таум каласен.
Ял калык лўм дене Ульяна Байметова выступатлен.
- Ме тиде жапым шуко ий вучышна, - каласен Ульяна Дмитриевна. - Мемнан ялыште йоча-влак, молодежь, пенсионер-влак, инвалид-влак улыт. Чылаштлан фельдшерын полышыжо кўлеш. Черланаш, конешне, огеш кўл. Но илышыште мо лийшашым нигӧ ок пале, медицинский полыш кунам-гынат кажнылан кўлеш. Мый чылалан тазалыкым да тиде у, йоҥгыдо ФАП-ыш плановый осмотрыш да прививкыш гына толаш тыланем.
ФАП-ым почмо годым верысе фельдшер Елена Апсадиковалан шуко поро мутым ойлымо. Тудо латвич ий тошто пу зданийыште, тудым коҥгаш олтен ырыктен, пашам ыштен. У ФАП-лан медпашаеҥ пеш куанен.
- Тений мартыште Памаш ялыште фельдшерлан пашам ышташ тўҥалмемлан 16 ий шуэш, - манеш Елена Юрьевна. - Тыгай ФАП-ым чоҥымылан пеш куаненам. Йоҥгыдо, шокшо - пашам ышташ чыла условий уло.
Фельдшерско-акушерский пункт автономный режим дене пашам ышташ тўҥалеш. Тушто вўд, электрическтво улыт.
ФАП-ым торжественно почмо деч вара Башкортостан Республикн здравоохранений министр Айрат Рахматуллин ден Мишкан рўдӧ районный больницын тўҥ врачше Валерий Гареев райрўдысӧ поликлинникын пашажым текшыреныт. Айрат Разифович коллегыже-влакым У ий дене саламлен, пашаштлан тауштен да медпашаеҥ-влакын йодмашышт ден ойыштым колыштын.
Светлана ТОЙМУРЗИНА.