Сай пєлек

Кажне ийын 21 мартыште Тўнямбал поэзий кечым палемдат. Тиде сылне пайрем пыстыл ден мутым йєратыше-влаклан, нунын коклаште Инесса Ардаш, ойыртемалтше улеш. Шукерте огыл тудын «Пеледыш деч нальым шижмашым» книгаже лектын. Авторын чын фамилийже Степанова. «Ардаш» псевдонимым Ардаш ялжын лўмжє дене налын. Тудо шукертак Марий Элыште ила гынат, шке шочмо Башкирийжым нигунам огеш мондо, шуко произведенийжым шкежын шочмо верже – Мишкан районлан пєлеклен. Поэтический шагатын участникше-влак: 1 №-ан лицейыште, полилингвальный шуко профилян школышто, Ирсай ялысе Искандаров лўмеш школышто тунемше-влак да марий йылме ден литературым туныктышо Ольга Муллашева, Надежда Салиева, Янина Ишалина лийыныт. Нунын воспитанникышт Инесса Ардашын сборникше гыч почеламут-влакым наизусть тунемын каласкаленыт. Нуным пайремыш ўжмє уна-влак – авторын аваже Ема Николаевна, акаже Зинаида Ишмаева, йоча годсо йолташыже, Бирский районысо Кужнур школын директоржо Эльвира Калимьянова, куанен колыштыныт. Мероприятийым вўдышє Марий историй да тўвыра рўдерын вўдышє специалистше Алексей Ибулаев Инесса Михайловнан аважым ўдыржын творческий корныжын тўналтышыж дене палдараш йодын. - Инесса Челябинский областьыште шочын. Вараже ме Ардаш ялыш илаш толна, тудо садикыш кошташ тўнале. Тунам телефон да интернет лийын огытыл, книгам лудыныт. Инесса вич ияшак лудаш тунемын, тиде ийынак тудо акаж дене пырля школыш кайыш. Вес ийжылан ме Кужнур ялыш илаш куснышна. Варарак мый Инессан почеламутым возымыжым пален нальым. Тудын возгалыме кагазше-влакым кызытат саклем. Теве шукерте огыл мыйын шочмо кечемлан тудо пеш чапле пєлекым – шкенжын почеламут сборникшым кучыктыш. Мый пеш чот куаненам! Ушанем, вашке кокымшо сборникшат лектеш. Книга-влакын лўмышт авторын раш шонымашыжым ончыктат. Книган «Пеледыш деч шижмашым налам» лўмжє кушкыл-влак дек чон вургыж ончымылан кєра шочын, очыни. Тидыжым акаже пенгыдемда: - Племянницем саскам пеш йєрата. Тудын пакчаштыже пеш шуко, 50 утла тўрлє саска уло. Мероприятийыш тыгак Башкортостан Республик образованийын сулло пашаенже, краевед Рита Ялаевам, «Эрвел марий» верысе калыкле-тўвыра автономийын председательже Валерий Байбулатовым, краеведческий библиотекын пашаенже Олеся Зайнетдиновам, районысо ветеран советын председательже Юлия Балахнинам, кугырак тукымын вашлийын мутланыме рўдер пеленысе поэзийым йєратыше-влак клуб вуйлатыше Нина Ямурзинам, самодеятельный автор - муро ден почеламутым возышо Светлана Салиевам ўжыныт. Светлана Салиевалан 75 ий темын, тиде мотор юбилейже дене тудым Юлия Григоьевна шокшын саламлен да районын мер илышыште кугу надырым пыштымыжлан тауштыме серышым кучыктен. Тидын дене сай сюрприз-влак пытен огытыл. Кужнур ялын шочшыжо, Башкортостан Республикын калык мастарже Ефим Камильянов Инессын аважлан шке кидше дене ыштыме аралтышым пєлеклен. Марий ИКЦ-н методистше Динара Владимироват Инесса Михайловна дене палыме улмаш. Йошкар-Олаште студент жапыште нуно келшеныт. Шуко жап эртымеке, угыч вашлийыныт да икте-весышт дене угыч мутланаш тўналыныт. Поэтический шагат шокшо шўлыш дене эртен. Участник-влак Инесса Ардашын почеламутшо-влакым лудыныт, тудын творчествыж нерген шке ойыштым каласеныт. Тыгай мероприятий самырык-влаклан пеш кўлешан, манын иктешленыт. Можыч, нунын коклаштат шкешотан талантан да уста-влак улыт.

Виктория ИШМУРЗИНА.