«Пашана земляк-влаклан пєлеклалтын»

21 ий ончыч Масгут Баширов лўмеш йоча сымыктыш школын тунемшыже Лидия Байназова уста композитор нерген возымо рефератше книгалан негызым пышта манын шоненат огыл. Тунам ты темым ойырен налаш тудлан БР-се образованийын отличникше, Башкортостанын культурыжо предметым туныктышо, Бирск оласе 3 №-ан школын библиотекарьже Флюра Ахметзянова темлен. Ятыр ий эртымеке, ўдыржын пашажым аваже - Лена Хакова шуен. Бирск олаште илыше Байназовмыт ешым Мишкан да Бирск районлаште гына огыл, а республикыштат сайын палат. Еш вуй Матвей Иманович – Башкортостан Республикын сулло врачше, Бирск оласе ЦРБ-ште врач-терапевтлан пашам ышта, пелашыже Лена Камильевнат 40 ий тазалык аралыме системыште тыршен. Сулен налме канышыш лекмеке, тудо возгалаш тўналын, «Дружба» районный газетын внештатный корреспондентше улеш. Матвей Байназов Мишкан район Кугу Соказа ял гыч, пелашыже Чекмагуш районын шочшыжо. Тиде келшен илыше да уста еш Бирск олаште 1983 ий гыч ила. Вате-марийын тиде кумшо книгашт. Икымше книгашт – «Поколенная роспись» 2021 ийыште лектын, тушто нунын тукымвожышт возалтын. 2023 ийыште кокымшо книгашт – «Бирск. Семейные хроники» книгашт лектын, тудо Бирск олалан 360 ий теммылан пєлеклалтын. Посна ужаш Бирск олаште ХХ курымын 80 ийлаштыже да ХХI курымын 20-шо ийлаште илыше ен-влакын пўрымашыштлан лўмлалтын. - Дмитрий Лихачевын ойлымо: «Еш альбом - элын историйжын негызше» мутым ушыш налын, ме олаште илыше ешвлакын пеш шуко фото да видеоматериалым шерын лекна, - ойла Лена Камильевна. – Книгаште Мишкан районын шочшыжо, кызыт Бирск олаште илыше-влак нергенат очерквлак улыт. Мемнан пашана земляк-влаклан пєлеклалтеш. Умаште кумшо книгам лукна - «Масгут Баширов - музыкант-просветитель». Тудын кугытшо 237 страница. 2004 ийыште школышто тунемше Лидия ўдырна «Дорогами Отечества» республиканский конкурсышто «Музыкант-просветитель» краеведческий пашам арален. Пеш сай материал погалтын, садлан тудо икымше верыш лектын. Очеркше 2005 ийыште «Бельские просторы» журналыште савыкталтын, тиддеч вара Масгут Зайнетдинович мыланна лишыл еныш савырныш. 2024 ийыште Бирск оласе Масгут Баширов лўмеш йоча сымыктыш школлан 75 ий темын. Музыкант да салтак Кугу Отечественный сарым вошт эртен (1941 ий гыч 1946 ий марте лийын), Берлиныш шуын, эмганен, контузитлалтын. Кум медаль дене наградитлалтын. Сенымашлан 80 ий темме вашеш тиде лўмлє музыкантым шарналтыде огеш лий. Масгут Башировын возымо «Лирический вальсше» тыныслык, пиал да волгыдо сем дене тич темын. Композитор йоча-влаклан, хорлан, фортепиано, домра да баянлан музыкальный произведений-влакым возен. Масгут Зайнетдинович пошкырт да татар калык муро-влаклан обработкым ыштен. «Масгут Баширов - музыкант-просветитель» книга презентацийыште ятыр документальный материалым ужаш лийын. Йоча-влак экспонат-влак дене палыме лийыныт да краеведын ойлымыжым тўткын колыштыныт. - Краевед Лена Хакован тыршымыжлан кєра ме кидыштына композитор, музыкант да музыковед, туныктышо, БАССР-ысе тўвыран сулло пашаенже, Кугу Отечественный сар ветеранын илыш корныжо да творчествыж нерген энциклопедийым кучена. Масгут Зайнетдинович Баширов БАССР-се композитор-влак ушемым ыштымаште кугу надырым пыштен, Бирск олаште сымыктыш школым почын да тушто директор лийын. Книгаште тиде уста ен нерген шарнымаш, документ, фотографий да ондак савыкталтдыме произведенийышт-влак пурталтын. - Ме книган авторжым куанен вашлийынна, - ойла йоча сымыктыш школын директоржо Дина Аликаева. – Мероприятийыш толшо-влаклан презентаций келшен. Тунемше-влаклан краеведын ойлымыжым колышташ онай лийын. Тудын ойлымыжым колыштын, шке пашажлан кумылан, шке ешыжым, олажым да землякше-влакым йєратыше еным ужына. Мероприятийым музыкальный номер дене ДШИ-те тунемше Альбина Мулламухаметова да фортепиано класс дене туныктышо Олеся Алексеева сєрастареныт. Нуно Масгут Башировын татар да пошкырт семжым шоктеныт. Вашлиймаш шокшо да поро шўлыш дене эртен да сай шарнымашым коден.

Светлана ТОЙМУРЗИНА.