Сарвика, Эвика да молат

Шукерте огыл Марий историй да тўвыра рўдерын залыштыже ен шуко лийын. Тыште райрўдысє школа гыч тунемше-влак курчак выставкым ончаш да лустыра гыч серлагыш-курчак-влакым ыштыме мастер-классыш толыныт. Ты мероприятий «Кидкопаште кече» йоча творчество фестиваль кышкарыште эртен. Мастарлык урок палдарымаш гыч тўналын. Толшо-влак тачысе илышыште курчак-влакын верышт, серлагыш-курчак-влакым ыштыме историй да тудым кузе ыштыме йєн дене палыме лийыныт. Теоретический ужаш деч вара серлагышым ямдылыме пашалан пижыныт. Серлагыш-курчакым ямдылыме опытышт дене Флорид Буляков лўмеш 1 №-ан лицейыште тўналтыш класслаште туныктышо Сания Бикмухаметова, Корак клубын методистше Диана Николаева да Монар Кўльтура пєртын творческий пашаенже-влак - Надежда Михайлова, Снежана Петрова да Лариса Александрова палдареныт. Удыр-рвезе-влак лустыра лапчык да тыглай шўртє дене серлагыш курчак-влакым ыштеныт. Мероприятийыште «Марий курчак» виш районный конкурс выставкын онай экспонатше-влак дене палыме лийыныт. Районысо школлаште тунемше-влак «Шке шогалше курчакым», «Курчак театрлан курчакым», «Традиционный калык курчакым», «Сувенир курчакым», «Пўртўс материал гыч курчакым» ыштеныт. А курчак-влакын лўмышт могай мотор лийыныт - Ониса, Унавий, Кечеви, Манюк, Янипа, Менсыле, Сарвика, Тачана, Эвика, Пампалче, Ювика… Чылаштын лўмыштым ойлен пытарашат огеш лий. - Конкурсыш тўрлє материал гыч шке ыштыме курчак-влак налылтыныт, - ойла культура пашаен Мария Минилбаева. - Кажне участник деке ик йодмаш лийын: курчак этнографический лийшаш, вес семын ойлаш гын, калык йўлалан келшыше да марий калык вургемым ончыктышаш. Конкурсыш чылаже 95 паша пурен. Курчак-влак тўрлє лийыныт, икте-весышт деч ойыртемалтыныт. Тўналтыш класслаште тунемше-влаклан палаш онай лийын, молан курчак-влакын чурийышт уке? Тидлан мероприятийым вўдышє Василий Кутлуметов тыгай вашмутым пуэн. Акрет жап гычак ялысе ўдырамаш-влак йоча ынже шорт, ынже йокроклане манын, курчак-влакым ыштеныт. Пасушто олым, шудо, лустыра лапчык гыч писын гына изи курчакым ыштен, йочаштлан модаш пуэныт. Икманаш, кидйымалне могай материал лийын, тудын дене курчакым ыштеныт. Тыгай курчак изи йоча-влакым ик верыште модын шинчаш кумыланден да иктаж энгек лиймаш деч арален. Сандене тудым «серлагыш, аралтыш» маныныт. Мероприятийын участникше-влак курчак ыштыме шотышто шуко онайым пален налыныт. Мутат уке, ик эн куанле татлан награжденийым шотлыман. «Марий курчак» виш районный конкурсышто сеныше да призовой верлам налше-влак диплом да шарнымаш пєлек дене палемдалтыныт. Тыгак сеныше-влакым ямдылыше вуйлатыше-влаклан тауштымашым увертареныт. Теве нунын лўмышт: Н. Михайлова, Л. Александрова, С. Петрова, И. Калитова (Монар СДК), И. Каншаева ден О. Каншаева (Нерге СДК), И. Ишалина (Чорай СДК), И. Александрова (Монар школ), Н. Иванова («Ласточка» 3 №-ан йоча сад), Е. Янситова (Кугу Соказа школ), С. Бикмухаметова (1 №-ан лицей), В. Янситова (Тымбай школ), О. Иксанова (Кемий СДК), Д. Николаева, В. Григорьева, Г. Янсубаева, О. Шамуратова (Корак клуб), Ю. Апкаликова (Йылыш клуб), А. Сахаутдинова (полилингвальный шуко профилян школ), О. Михайлова (Озерка клуб). - Традиционный марий курчак-влак кумдан палыме улыт, - ойла Корак клубын методистше Диана Николаева. - Тудым ялыште илыше кажне ўдырамаш ыштен моштен. Тыгай курчак-влак йоча-влакын модышышт лийын, суртышто серлагыш семын саклалтын. Тыгай конкурс-влак пеш кўлешан улыт - самырык-влак калык йўла деке шўманыт. Корак йоча-влакын конкурсыш пуымо 11 курчак гыч визытше призовой верыш лектын. «Марий курчак» выставкыште участвоватлыше чыла йочалан кугу таум ойлена. Ончыкыжымат нунылан мастарлыкыштым шуараш тыланена.

Светлана ТОЙМУРЗИНА