«Уярня - 2025»

Марий календарь почеш шошо жап шумым «Уярня» пайрем ончыкта. Тудым акрет годсекак февраль мучаште - март тўналтыште пайремленыт. Тудо шочмын тўналеш да арня мучко шуйна. Тиде шуматкече молыгунамсе теле кече деч нимо денат ойыртемалтын огыл: игечыже йўштырак шоген, коклан-коклан мардежат пуал колтен. Тўвыра полат ончылно ен-влак тич темыныт. Йырым-ваш тамле шашлык, кўэштме шокшо мелна пуш шарлен. То ик вере, то вес вере музикан, тўмыр йўк-влак шергылтыт. Пайрем тўналме жаплан ен-влак пеш шукын погыненыт. Йоча-влак, утларакшым, лум курык вуйышто шогышо Куштыра кува-влак йыр пєрдыныт. Пайремыш толшо-влакым район администраций вуйлатыше Павел Трапезников, БР-се калык творчество республиканский рўдерын регион да калык-влак кокласе келшымаш отдел вуйлатыше Зарина Хасанова, БР-се Калык-влак келшымаш пєрт директорын заместительже Альбина Айгишева, БР Государственный Погын - Курултайын депутатше, БР-се финн-угор калык-влак ассамблейын председательже, «БР-се мордва калыкле-тўвыра рўдер» региональный мер толкынын председательже Юлия Герасимова саламленыт. Тений фестивальышке Мишкан, Калтаса, Балтач, Татышле, Стерлитамак да Бурай районла гыч 12 финн-угор коллектив толын. Кажне коллектив концерт номерым да калык модмаш-влакым ямдылен. Жюрин иктешлымашыж почеш конкурсный программыште вер-влак тыге шеледалтыныт: калык йўлам арален да виянден толмо номинацийыште диплом дене «Ош вис-вис» фольклор ансамбль (Бурай район), «Инвожо» одо вокальный ансамбль (Татышле район), «Кумыл» гармонист-влак ансамбль (Калтаса район), «Ужара» марий фольклор калык ансамбль (Балтач район), «Акарт» фольклор калык ансамбль (Мишкан район) палемдалтыныт. Кумшо верым «Ший памаш» фольклор калык ансамбль (Мишкан район), «Керей сем» фольклор ансамбль (Калтаса район), «Вастома» мордва фольклорно-этнографический ансамбль (Стерлитамак район), «Изенер» фольклор коллектив (Мишкан район) налыныт. Кокымшо верыш «Нурпеледыш» вокальный ансамбль (Мишкан район) ден «Рвезылык» фольклор коллектив (Мишкан район) лектыныт. Икымше вер Марий историий да тўвыра рўдер пеленсе «МуроЭм» вокальный калык ансамбльлан логалын. Фестиваль кышкарыште «Марий патыр - 2025» конкурс эртен. Тушто Балтач, Бурай да Мишкан районла гыч кандаш марий патыр вийжым терген. Участник-влак тыгай заданийлам шуктеныт: «Мый - марий улам!» визитный карточка, «Вий, проворлык да тура». Кумшо степенян диплом дене Лев Мусин (Бурай район), Станислав Хайдаршин (Бурай район) да Федор Кутлияров палемдалтыныт. Кокымшо степенян дипломым Марсель Николаев (Мишкан район) да Закир Хакимов (Мишкан район) налыныт. Икымше степенян диплом Артур Сайпановлан (Балтач район) ден Кирилл Иликаевлан (Мишкан район) логалын. «Марий патыр - 2025» конкурсышто сенышыш Мишкан район гыч Руслан Янситов лектын. Пайремыште районысо организаций-влак коклаште эн сай Куштыра кувалан да пайрем ўстеллан конкурс эртен. Конкурсант-влак пайремыш толшо кажне енлан шокшо чайым темленыт. Пайрем мероприятий Куштыра кувам йўлатыме дене пытен.

Светлана ТОЙМУРЗИНА