Республикын кечыжым палемденыт

Башкортостан Республикын кечыжлан лўмлалтше мероприятийыш паша коллектив-влакын представительышт, район советын, БР-се Государственный Погын – Курултайын депутатышт, почетан уна да моло миеныт. Концертын торжественный ужашыже кум йылме дене саламлымаш дене тўналын. Тылеч вара вўдышє-влак калыкым Республикын кечыж дене шокшын саламленыт. Мероприятий вашеш РДК фойеште декоративно-прикладной искусство паша выставке эртен. Тушто верысе мастер-влакын пашашт верланен: чылалан сайын палыме Дим ден Рим Галимовмытын пу гычын пўчкын ыштыме тўрлє арверышт, Любовь Калитован кидпашаже-влак. Л. Калитован паша выставкыже «Марий тўрын сылнылыкше» («Красота марийского орнамента») манылтын, тушто сўрет, калык вургем, сєрастарыме ўзгар-влак лийыныт. Эше ик выставке «Ветеран сурт-оралте» манылтын. «Башкирийыште кужу ўмыр» проект кышкарыште Мишкан районышто 2018 ий гыч «Эн сай ветеран сурт-оралте» конкурс эртаралтеш. Тачысе кечылан тушто шўдє утла еш вийжым терген. Выставкым ончымеке, ен-влак залышке эртеныт. Пайрем концерт «Башкортостан» муро дене тўналын. Республикына нерген мурым Анастасия Белоусова йонгалтарен. Тиде муро деч вара сценышке Мишкан район МР администраций вуйлатышын пашажым шуктышо Лариса Александрова лектын. Тудо погынышо-влакым пайрем дене шокшын саламлен да республикына ден районна калыкын илышыжым саемдаш тыршен ончыко ошкылмыштым палемден. Тылеч вара торжественный обстановкышто шочмо вер-шєрна да кундемнам вияндыме да тўзатыме пашаште ойыртемалтше-влакым палемдыме. Чолга пашаен-влаклан БР-се Мишкан район МР совет ден администрацийын чап кагазышт ден тауштыме серышыштым Мишкан район МР совет председатель Валерий Гареев кучыктен. Палемдымаш деч вара эше саламлымаш-влак лийыныт. Калык ончылно БР-се Предпринимательство да туризм министр Зухра Гордиенко ден БР-се Государственный Погын – Курултайын депутатше Зульфия Гайсина выступатленыт. Нуно 2024 ийыште Башкортостан Республик вуйлатышым сайлымаште общественный наблюдатель семын пашам ыштыше-влаклан Башкортостан Республикысе Общественный палата деч тауштымашым кучыктеныт. Тыгаяк тауштымашым ятыр енлан Мишкан район МР совет ден администраций лўм дене кучыктымо. Июнь гыч сентябрь марте районыштына территориальный самоуправлений да ял староста-влак конкурс эртен. Пайрем кечын тушто сеныше ден ойыртемалтше-влакым палемдыме. «Лучшее ТОС по содействию формирования активной жизненной позиции, поддержки гражданской инициативы» номинацийыште Корак, Эшым, Ваксола, Раевка да Маевка ялвлак палемдалтыныт. «Лучшее ТОС в обустройстве территории проживания» номинацийыште – Пєкленде ял, «Лучшее ТОС по привлечению жителей к благоустройству и обеспечению чистоты в населенном пункте» номинацийыште – Тєнгак ден Пекшек. «Наша деревня – наше наследие» номинацийыште – Андреевка ял палдемдалтыныт. Конкурсышто кумшо верым Кугу Шаде сельсовет сельский поселенийысе Калмазан яллан пуымо, кокымшо вер – Ардаш сельсовет сельский поселенийысе Тєлдє яллан логалын. Конкурсышто Чорай ялысе ТОС сенен. Башкортостан Республикысе «Атайсал – шочмо вер-шєрем» проектыште чолган участвоватлымылан тауштыме серышым Пєкленде ялысе ТОС председатель Виталий Кутлукаевлан кучыктымо. Пайрем кечын торжественный обстановкышто шукерте огыл шєртньє сўаныштым палемдыше Хакимзян Гильмиярович ден Гульфира Раисовна Аллаяровмытым, Харис Гарифуллович ден Сафия Сафиновна Гайфуллинмытым, Шамиль Файзилбариевич ден Винера Шамсувалиевна Чураевмытым палемдыме. Тылеч вара Икымше-влак движенийын «Ме Российын гражданже улына!» проектше кышкарыште куд самырык енлан торжественно Россий Федерацийын гражданинже паспортым кучыктымо. Пайрем мероприятийышке СВО-што участвоватлыше салтак-влакын ешыштым ўжмє. Ойган да шўлыкан тат-влакат лийыныт. Мишкан да Бурай районласе военный комиссар Николай Дульцев посна военный операцийыште вуйыштым пыштыше салтак-влакын ешыштлан салтак-влакым палемдыме награда-влакым – Мужество орденым, Жуков медальым, «Участнику специальной военной операции» медальым - кучыктен. Палемдыде кодаш ок лий – нине салтак-влак мемнан тыныс илышна верчын вуйыштым пыштеныт. Посна военный операций чап деке ошкыл огыл – тиде калыклан кугу трагедий, а лишыл енышт ден родо-шочшыштым йомдарыше-влаклан нимучашдыме ойго. Мероприятийыш мийыше-влак салтакна-влакым ик минут шып шоген уштеныт. Концерт программыште Культура дворецын артистше да Йоча искусство школышто тунемше-влак усталыкыштым ончыктеныт. Мишкан селасе Флорид Буляков лўмеш 1 №-ан лицейыште Россий Федерацийын Геройжо генерал-майор Минигали Шаймуратов лўмеш класслаште тунемше-влак «Родной мой край Башкортостан» мурым йонгалтареныт. Тиде лицей пеленсе «Креатив» куштышо коллектив чолга пошкырт куштымашым куштен. Ончышо-влакым музыкальный пєлек дене тыгак мурызо-влак Ильфак Арсланов, Алексей Ибулаев да Надежда Иванова куандареныт. Концертым шкеныштын выступленийышт дене «Кушто да муро, Россий элем!» («Танцуй и пой, моя Россия!») VII всероссийский сценический искусство фестивальын региональный этапшын лауреатше-влак – «Эрвел» куштышо калык ансамбль ден Мишкан селасе Культура дворец пеленсе калык хор сєрастареныт. Моло номер-влакат онай лийыныт. Концерт лирический, калык да эстраде муро-влак, калык куштымаш-влак гыч шоген. Кажне номер патриот шўлышан лийын. Мучашлан сценышке Азат Ханов лектын, тудо «Башкортостан» мурым сылнын йонгалтарен. Пайрем мероприятийым Василий Кутлуметов ден Регина Исмагилова устан вўденыт. - Башкортостан Республикынан историйже да культурыжо моткоч поян улыт, тыште уже ятыр курым тўрлє калык ваш келшен ила. Ончыкылыкнат волгыдо – республикына утыр виян толеш, - каласен мероприятий деч вара Калмазан ялын старостаже Резеда Шарифьянова. – Пайрем республикысе тўрлє калыкым икоян ышташ, ик кугу ешыш ушаш полша, икте-весыланна полшен илаш кумыланда. Ме кугезына-влаклан мыланна ожсо геройна, патырна-влак нерген ятыр легендым, героический поэмым, преданийым арален кодымыштлан кугу таум ойлена. Мыланнат шкенан историйнам шарныман да тудын нерген икшывына ден уныкана-влаклан палдарен шогыман. Ме чыланат, шкенан историйнам шарнен, ончыко кугешнен да ўшанен ончышаш улына.

Светлана ТОЙМУРЗИНА