Тау, «Старт»!

- Старт лагерь почылтмылан тений 50 ий темын, тудлан негызым СССР спорт мастер, тренер Денис Тимиркаевич Тимиркаев пыштен, - каласен пайрем тўналтыште лагерьын директоржо Родион Шайбаков. – Таче мемнан деке кугу сенымашыш шушо спортсмен-влак толыныт, нуно чыланат икымше стартым лач «Спорт» спортивно-тазартыме лагерьыште налыныт. Тылеч вара тудо йоча-влакым пайремышке толшо лўмлє спортсмен-влак дене палдарен. Игече йўран лийын гынат, уна-влак ятырын толыныт. Спортын ветеранже-влак, икте-весыштым вашлийын, кужу жап мутланен шогеныт. Кокымшо сменаште каныше йоча-влак нунын ўмбаке изишак єрын, тыгодымак кугешнен онченыт. Вожатый-влак нунын дене пырля онай пайрем мероприятийым ямдыленыт. Йоча-влак тиде кечын муреныт, куштеныт, келшымаш нерген сценке-влакым ончыктеныт. Чыланат тыгак лагерьыште телым каныме нерген видеом онченыт. Вет 2015 ийыште «Старт» лагерьыште телым каныме комплекс ышталтын. Тушто чылаже 25 ен канен кертеш. Каныше-влак пўнчє чодыраште ече дене коштын, тюбинг дене курык гыч мунчалтен, мончаш пурен кертыт. Тыгак колым кучаш, ийыште коньки дене кошташ, пейнтбол дене модаш йєным ыштыме. Поран тўналеш гын, лагерьыште ўстел теннис, бильярд дене модаш лиеш, тыгак тазалыкым шуараш велотренажер уло. Кумылан-влак компьютер дене модын, телевизорым ончен кертыт. Но пургыж ден поран канаш мийыше-влакым изишат огыт лўдыктє. Чаманаш кодеш, пандемий икмыняр ий калыклан «Стартыште» канаш йєным пуэн огыл. Уна-влак тыгак каратэ дене кылым кучышо-влак нерген видеом онченыт. Лагерьыште икымше сменаште лач каратист-влак каненыт. Рашрак лияш гын, нунын канышышт спортивный сбор сынан лийын – кужу жап тренировкылан ойыралтын. Лагерьыште каныше эн изи спортсмен куд ияш гына лийын. Каласен кодыде ок лий, каратист-влак Мишкан район гыч веле огыл, моло районла гычат лийыныт. - «Старт» лагерь эре ончыкылык спортсмен-влаклан трамплин семын лийын, - каласен мероприятийыште Мишкан районысо образований отделын специалистше Лилия Мустафина да Родион Шагиевичлан тауштыме серышым кучыктен. – Те шкендан пашаланда ўшанле улыда, тудын верч шкендам чаманыде тыршеда, коллективым устан вуйлатеда. Тек чолгалыкда нимучашдыме лиеш. «Старт» лагерьлан виянаш да пашажым эшеат саемдаш тыланем! Мероприятий годым лагерь кузе шочмо дене тудлан негызым пыштыше Денис Тимиркаевын эргыже Виталий Денисович палдарен: - Мый тыште физический культура шотышто инструктор лийын ыштышым. Самырык Родион Шагиевичын пашаш толмыжымат сайын шарнем. Ондак спортсмен-влак палаткылаште иленыт. Кенеж гочлан кум смена канен, кажне сменаште 100-120 наре йоча погынен. Тылеч вара мутым спортын ветеранже Эрик Ибагишевлан пуымо. - 1974 ийыште ме, Мишкан районысо йоча-влак, Уфашке ече дене танасаш миенна. Тушто сайын выступатлымеке, Денис Тимиркаевич районыштына спортлагерьым почаш ойым луктын. Тунам тыгай лагерь республикыштына эше лийын огыл. Райсовет исполкомышто тиде ой дене келшеныт. Тылеч вара ме лу ен илыме палатке-влакым да моло кўлешым налынна. Чорай интернат кровать-влакым пуаш келшен. Чумыр вий дене ме мончам ыштышна, паярын пєртыштыжє столовыйым почна. Мишкан район МР совет председатель Вячеслав Сабиров лагерь дене келшен илымыж нерген ойлен, тудо, полыш кўлеш гын, «Стартлан» эре полшен шога. - Мый «Старт» лагерьлан 2015 ийыште полшаш тўналынам. Ме уремысе площадкым тўзаташ, отопленийым ышташ полшышна, мончаште конгам верандышна. Мый лагерьышке толмем еда куанем - тудо уже пел курым пашам ышта да пашажым виянден веле шога. Пайрем мероприятийыште тыгак моло уна-влакат выступатленыт. Нунын коклаште Аркадий Яманаев, Владимир Шамратов, Геннадий Сергеев, Павел Никитин, Роман Ибаев, Юрий Ибашев да моло лийыныт. Уна семын тыгак витле ий ончыч лагерь почмо годым флагым нумалын ошкылшо Светлана Яшпаева ден Лидия Мусагитдиновам ўжмє. Нуно самырыкышт годым писе ечызе лийыныт. Кызытат спорт дене кылым огыт кудалте. Мероприятийыш эше ик ечызе – Ирина Ибашева толын. Тудо шкеже Белебей районышто шочын-кушкын. Районышкына икымше гана 1988 ийыште сборышко толын. Пайрем кечын «Старт» лагерьлан тау мутым Сергей Васюткин ойлен. Тиде предприниматель спортивный имне-влакым онча: - Жап рашемда – спорт дене кылым кучышо-влак илышыште сенымашыш утларак шуыт. «Старт» лагерь ятыр енлан тале спортсмен лияш полшен. Тыште Денис Тимиркаевичынат надырже кугу. «Старт» лагерьыште унавлакым эре шокшын вашлийыт. Родион Шагиевич Алена Киликаевалан ветеран-влакым тауштымаш дене палемдымыжлан кугу таум ойлен. Тыгак лагерьыште пашам ыштыше коллективлан тау мутым каласен. Тений «Стартыште» Наталья Айкашева, Анастасия Аблеева, Карина Дмитриева, Марианна Шайбакова, Ксения Аблеева, Анастасия Айбашева, Лада Кутлубаева, Алексей Апсаликов ыштеныт. «Старт» лагерь, мемнам пел курым куандарыметлан кугу тау!

Виктория ИШМУРЗИНА.