«Ойганен шарналтеныт»

21 июньышто 23.00 шагатыште мишкан калык 83 ий ончыч шочмо элнам аралаш шогалше-влакым шарналташ чумырген. Акцийын эн самырык участникше-влак коклаште ача-ава дене пырля толшо изи йоча-влак лийыныт. Ача-авашт сортам чўктеныт. Ик ияш изи йоча-влак эше молан тыге ыштымым палыде, ача-ава почеш сортам шынденыт. Но изиш кугеммеке, нуно могай кўлешан мероприятийыште участвоватлымышт нерген умылат. Ме ўшанена, ончыкыжым нуно элнан чын патриотшо лийын кушкыт. Курымашлык тул воктене икмыняр лу сорта йўлен, Кугу Отечественный сарыште колышо-влак ончылан вуйсавымашым ончыктен. Мероприятийым вўдышє В. Кутлуметов почын. - Шочмо элна верч вуйыштым пыштыше землякна-влак нерген шарнымаш тек чылам уша. Нигєат, нимоат мондалтшаш огытыл, - каласен тудо. Погынышо-влак ончылно район администраций вуйлатышын икымше заместительже Л. Александрова выступатлен: - Чын историйым арален да тудым тукым гыч тукымыш кусарен толмаш - суапле да эн кўлешан паша. Ме, Российыште илыше-влак, ту жапысе шучко кече-влак да мемнан кугезына-влакын подвигышт нерген нигунам огына мондо. Шарнымаш да ойганымаш кечын кастене шарнымаш сортам чыла вере чўктат. Сарыште сенымаш мемнан калыклан куштылгын толын огыл. 1418 кече да йўд мемнан историеш эрелан возалт кодеш. Мемнан Мишкан районат Сенымашке шуаш суапле надырым пыштен. Нине неле кечылаште районысо военный комиссариат 10000 утла еным фронтыш колтен. Нунын кокла гыч шукышт курымешлан сєй пасушто кодын. Лариса Геннадьевна Михаил Львовын «Поклонимся великим тем годам» почеламутшым пеш сайын лудын да Кугу Отечественный сарыште кредалше кочаже-влак нерген ойлен. Кугу Отечественный сарын ветеранже-влакын лўддымылыкышт да геройло подвигышт тачысе тукымлан сай пример. Мишкан-влак нунын дене кугешнат да эре шарнен илаш тўналыт. Нунын примерышт почеш таче землякна-влак СВО-што участвоватлат, кочана-влакын пашаштым ўшанлын шуктат. Нунат, кочашт да кугезе кочашт семынак, шочмо элнан эрыкше верч фашист-влак ваштареш кредалыт. Митингын участникше-влак колышо землякна-влакым ик минут тып шоген уштеныт. Патриотический мероприятийыште Кугу Отечественный сар жапым чытен лекше йоча-влак, сар жапысе йоча-влак, участвоватленыт. Нунын кокла гыч иктыже - Мишканыште илыше Мария Алтынбаевна Аймурзина. Кунам Кугу Отечественный сар тўналын, тудлан кок тылзе гына улмаш. Мария Аймурзина шке ачажым еш альбомысо фотографиий-влак гыч веле шарна. Кузе чот мєнгє пєртылмыжым вучымыжо нерген ойлен. Ныл ияш улмыж годым каваште самолетым ужын, кидым рўзен «Ачаем кондо» манын йодын. Но изи Машан йоча ўшанже шукталтын огыл - ачаже 1944 ий августышто колен. Икымше-влакын движенийыштын чолгае‰же-влак Рада Андрюшкина, Алена Филлипова да Розалия Халикова шке кочашт да кугезе кочашт нерген ойленыт. Тиде кечын ик акций кышкарыште вес акций - «Йошкар гвоздика» эртен. Тыгаяк лўман значок акций - ветеран-влаклан эм дене полшымылан тауштымаш. «Шарнымаш сорта» акцийын участникше-влак тыгай значокым налын, ветеранна-влаклан полшаш мыняр-гынат надырым пыштеныт.

Светлана ТОЙМУРЗИНА.