Келшымаш
+25 °С
Раш
Все новости
Тӱрлӧ
22 Сорла 2023, 15:53

Ольга кокайлан 90 ий!

Тений кеҥежым Ольга Салишева 90 ияш юбилейжым палемден.

Ольга кокайлан 90 ий!
Ольга кокайлан 90 ий!

Ольга Шамидановна Салишева 1933 ий 5 июльышто Нерге ялыште тыглай кресаньык ешыште шочын. Ачаж ден аваже колхозышто пашам ыштеныт. Ольга тўҥалтыш класс-влакым шочмо ялыштыжак тунемын. Ик жап гыч ешышкышт кугу ойго толын, ўдырын 4 классыште тунеммыж годым аваже колен, садлан Ольга Шамидановна умбакыже тунемын кертын огыл.
Суртыштышт чўчкыдын кочкашат уке лийын, чияшат нимо уке улмаш. А ешыште вич икшыве ава деч посна кодын: Орина, Каритон, Метрий, Ольга, Аля. Мом ыштет?
Ольгалан пашаш каяш пернен. Тыге, колхозышто тыршаш изи лийын гынат, тўрлӧ пашам ышташ коштын. Пасушто кылта пидаш полшен, моло тўрлӧ пашаланат
тунемын. Тыге тудо кугемын. Сар годым илыш эшеат чот нелемын, нунылан пеш йӧсӧ лийын.
- Ачам сарыш каен огыл, тудо Мокрушино ялыште военный солдат-влаклан костыльым ыштен, кустар лийын, - ойла Ольга кокай. – Ыштыме костыль-влакым
Уфаш наҥгаеныт, а тувеч - кўлеш верыш.
Кугурак лиймекем, торфым лукмашке кум гана миенам, тушто ышташ тоже ансатак лийын огыл.
1956 ийыште, торфым лукмаш гыч толмекем, Салишев Гавриллан марлан лектынам. Ме пырля 7 икшывым ончен куштенна: Эдикым, Валям, Валерийым, Верам, Викторым, Венерам да Маринам.
Чыланат мужыраҥыныт, чыланат коча-кова лийыныт, кажныжын сурт-печыже уло, - ешарен ойла Ольга кокай. Икшывышт аваштым огыт мондо, толынак шогат. Теве 90 ияш пайремышкыже шукын толыныт ыле. Кокайын 21 уныкаже, 16 кугезе уныкаже улыт, нуно Ольга кокайым эре куандарен шогат. Кызыт Ольга Шамидановна Аля шўжарже дене илыше улыт. Моло шочшышт ош тўня дене чеверласен, тугак марийжат каен. Пелашыже жапыштыже колхозышто механизатор лийын ыштен.
Ольга кокай мураш чот йӧрата, шуко такмакым, йўмаш мурым пала. Клубышто эртарыме пайремлашке ожнырак эре коштын, кызытат толеш. Клубышто мурышо-влак тудын толмыжлан куанен гына шогат.
Ольга кокай кызыт Виктор эргыже да Инга шешкыж дене ила. Вийже ситыме семын нунылан полшаш тырша. Юбилейже годым ме Ольга кокайым пенсионер-влак лўм дене шокшын саламлышна да тазалыкым тыланен ямле мурым мурышна.
Йӧн дене пайдаланен, Ольга Шамидановнам Нерге ялысе ветеран-влак организаций лўм дене эше ик гана саламлем да тазалык, суап дене эшеат кужурак
ўмырым тыланем!
Илыш йогын дене модын
Илыза кечын куанен.
Сай тазалыкым, пиалым,
Кужу деч кужу ўмырым
Тыланда мый тыланем.
М. ГАРЕЕВА, Нерге ялысе ветеран организацийын председательже.

Ольга кокайлан 90 ий!
Ольга кокайлан 90 ий!
Ольга кокайлан 90 ий!
Ольга кокайлан 90 ий!
Автор:Вячеслав Камилянов