Шочмо кундемым тўзатышашлан

Черетан погынымаш эн ончыч шуктышаш паша-влакым палемдаш, калык дене эн сайын пашам ыштыме шотышто конкурсын положенийжедене палыме лияш, 2022
ийсе конкурсым иктешлаш эртаралтын.
Мероприятийым Мишкан район МР совет секретарь Татьяна Коледина почын. Тудо погынышо-влаклан 2019 ийыште Башкортостан Республикыште «БР-се ял староста-влак нерген» закон лекме нерген ушештарен. Тиде закон Башкортостан Республикыште ял староста-влакын пашаштым виктарен шогаш тўҥалеш.
Мишкан районышто 52 староста уло. 2022 ийыште ТОС да староста-влак коклаште эртарыме конкурс кышкарыште опытан староста-влак дене пырля шочмо ялыштым тўзатышаш верч тыршыше у еҥ-влакын лўмышт рашемын. Тиде - Лариса Исламова (Тӧҥгак), Валерий Мурадымов (Корак), Светлана Бикнязева (Ленинский), Вера Васюткина (Раевка), Маргарита Кайниева (Маевка).
Совещанийыште опытан, ятыр ий пашам ыштыше, калык коклаште кугу пагалымашым сулен налше вуйлатыше-влакым палемдыме. Тиде - Николай Янсубаев (У Памаш), Василий Казимов (Лепешкан), Нафгат Валиуллин (Иштыбай), Альберт Иманов (Йылыш), Радик Мустафин (Руш Байбак), Павел Килинбаев (Шаде Шогертен), Виссарион Ишмурзин (Уял).
Кажне ийын республикыште конкурс-влак эртаралтыт, проект ден программа-влак илышыш шыҥдаралтыт. 2022 ийыште Маевка, Раевка, Калмазан, Озерка
ял староста-влакын инициативышт почеш ял-влак «Айык аул» республиканский конкурсышто участвоватленыт. Калмазан ден Раевка ял-влак призер лийыныт,
Маевка ден Озерка ял-влак тўрлӧ номинацийыште сеҥышышлектыныт. Конкурсышто участвоватлаш мероприятий-влакым эртарыме планым тўрыснек староста-влак ямдыленыт. Нуно тыгак ППМИ программыште чолган участвоватлат. Староста-влак пашам сайын ыштат, ялыште илыше-влак дене ик ойыш шуыт, ял гыч вес верыш куснен кайыше земляк-влак дене кылым кучат, спонсор-влакым муыт, предприниматель-влакым тўрлӧ пашам шуктымашке ушен моштат.
Башкортостан Республикыште
«Атайсал» проект илышыш сайын шыҥдаралтеш. Кок ий жапыште республикыште шым тўжем утла проект илышыш шыҥдаралтын, тушечын 360 Мишкан районышто.
2023 ийым БР вуйлатышын Указше почеш республикыште Шочмо кундемлан пайдале паша идалыклан увертаралтын. Села ден яллаште еҥ-влакын, староста да земляк-влакын инициативышт почеш шуко поро паша шукталтеш. Ме шкенан районысо яллаште моторын солымо уремлам, йоча площадке-влакым, Кугу Отечественный сарын участникше-влаклан тўзатыме обелиск-влакым куанен ончена.
Ял староста ден сельский поселений администраций вуйлатыше-влак пожар лиймашым ончылгоч кораҥдыме шотышто профилактический пашам шуктымылан кугу верым ойырат. Тиде йодыш дене совещанийыште 87-ше пожарный частьын начальникше Сергей Вялов выступатлен. Староста-влакын паша опытышт дене палыме лийме шот ден мутым Маевка ялын старостаже Маргарита Кайниевалан пуымо. Тудым старосталан 2022 ийыште сайлыме.
- Ик ий пашам ыштыме жапыште шуко ыштыме, - каласен Маргарита Микеевна. - Ме субботниклам эртаренна, тушто мемнан ялыште илыше-влак Чорай ден Маевка кокласе корно воктене арама-влакым руэныт, школ автобус шогалме олмышто павильоным шогалтыме, 1941-1945 ийласе Кугу Отечественный сарын участникше-влаклан шогалтыме мемориал воктене печым уэмдыме.
2022 ийыште ялын чумыр историйжылан икымше гана ТОС-влак коклаште эртарыме районный конкурсышто участвоватленна да «Эн творческий ял»
номинацийыште сеҥышыш лектынна. Тидын дене чарнен шогалын огынал, «Айык ял - 2022» районный конкурсышто участвоватлаш йодмашым пуэнна да
«Еш институтым аралымаште эн сай лектыш» номинацийыште сеҥенна. Мемнан ялна ий гыч ийыш тўзланен толеш. Совещанийыште ТОС-влак коклаште эртарыме конкурсым иктешлыме. Сеҥыше ял староста-влакым торжественный обстановкышто наградитлыме.
Совещанийын участникше-влак У Памаш ялышке уэмдыме памашым почмашке миеныт.

ЯЛЫН ЧИНЧЫЖЕ
У Памаш ялыште илыше-влакын ик эн йєратыме верлан «Чай вўд памаш» шотлалтеш. Тиде памаш шке ўмырыштыжӧтўжем дене еҥым яндар вўдшӧ дене куандарен да кызытат тиде поро пашам шуктен шога.
Памаш - тиде вўд гына огыл, а чон. У Памаш ялыште илыше-влак Юмын пуымо тиде юзо памашым арален кодышаш верч шуко ыштат. Уэмдыме памашым
почмо мероприятий ял калыклан да уна-влаклан кугу пайремышке савырнен.
Памашым почмашке толшо-влакым саламлыме шомак дене район администраций вуйлатыше Павел Трапезников, Мишкан район МР совет депутат Николай Яваев выступатленыт.
Николай Изиляевич палемден, 30 ий ончычат тиде вер еҥ-влакын ик эн йӧратыме верыштлан шотлалтын. А ынде уэмдыме деч вара тудо эше моторрак да
тушечын вўдым налаш йӧнанрак лийын.
Мутат уке, «Чай вўд памаш» районыштат ик эн сайлан шотлалтеш. Памаш воктене беседкым ыштыме, йырже шудым солымо, тўрлӧ шўкшакым йырым-йыр эрыктыме, памашыш волымо корным ыштыме.
Н. Яваев тиде памашым тўзатымаште тыршыше-влаклан чон гыч лекше таум ойлен.
- Чылан келшен, ик команде дене пашам ыштеныт, - каласен тудо. - Ончыкыжымат ме пырля-пырля тиде верым порядкыште кучаш тўҥалына. Чылалан
кугу тау.
Памашым тўзатымаште ойыртемалтше-влаклан район администраций вуйлатыше тауштымаш-влакым кучыктен. Тиде пашаште Владислав Изибаев, Елисей Осипов, Леонид Яныбеков, Андрей Япаев, Ростислав Япаев ойыртемалтыныт.
Николай Яваевланат Тауштыме серышым кучыктымо. Пайрем мероприятийым Культура дворецын мурызыжо Олесия Мусалина сєрастарен. Тудо «Памаш вўдым йӧратем» мурым йоҥгалтарен. У Памаш ялыште илыше-влак уна-влакым памаш вўд дене сийленыт.
- Мемнан памаш вўд юзо виян, - ойленыт нуно. - Шокшо годым тудым подылат, вик йўмӧ шумо пыта, а черле-влакым тиде илыше вўд эмла.
Кумылан-влак памаш воктенак шокшо чайым тамле мелна да мўй дене йўын кертыныт.
Светлана ТОЙМУРЗИНА.