Кашкын-влак деке унала

Мемнан делегацийым Мишкан район МР советын секретарьже Татьяна Коледина вуйлатен.
Тушко тыгак пуреныт: Монар сельсовет СП администраций вуйлатыше Юрий Яншаев, Монар сельсоветын пашажым виктарыше Дина Аликова, «Дружба» районный газетын корреспондентше Светлана Тоймурзина да «Рвезылык» вокальный ансамбльын участникше-влак: Диана Николаева (ансамбльын вуйлатышыже), Георгий Паситов (аккомпаниатор), Алевтина Шамшитова, Валентина Салишева, Зинаида Янгубаева, Тамара Ташбулатова, Галина Яшкина, Людмила Игинашева да школышто тунемше Полина Григорьева.
Фольклор пайрем Аскын районысо Кашкын ялысе уэмдыме Культура пӧртыштє эртен. Тушко кум районын представительже-влак - «Айык ял - 2022» республиканский конкурсын муниципальный этапыштыже сеҥыше-влак погыненыт. Мишкан районышто Корак ял сеҥышыш лектын. Балтач районышто Янтемыр, Аскын районышто Кашкын ял-влак йўмым чарненыт. Тиде пайремым Кашкын ял «Айык ял» республиканский конкурс кышкарыште эртарен. Пайремышке пошкудо районла гыч мийыше уна-влак деч посна Аскын районысо шым ялын представительже-влак шке шондыкышт дене толыныт.
Саламлыме шомак да почетный уна-влакын выступленийышт деч вара Мишкан районысо Монар СП ден Кашкын СП вуйлатыше-влак Юрий Яншаев ден Ринат Галявутдинов вашла келшен илыме, культура, спорт да моло мероприятий-влакым пырля эртарыме шотышто соглашенийым подписатленыт. Варажым муро да куштымаш, тўрлӧ модмаш-влак дене пайрем умбакыже шуйнен. Кажне коллектив шке шондыкшым арален. Тыште акрет годсо тошто шондыкат, шкатулкым ушештарыше изи шондыкат, кызыт гына ыштыме у шондыкат (Корак-влакын) лийыныт. Мемнан-влакын намийыме шондыкышто марлан кайыше ўдырын поян пєлекше лийын. Оръеҥын рольжым Полина Григорьева модын. Тўрлеман ош тувырым чийыше оръеҥ дене шуко еҥ шарнымаш фотом ыштен.
Вокальный ансамбльын участницыже Зинаида Янгубаева шке кидше дене ургымо марий вургемым чиктыман курчак-влакым намиен. Тудо пайремын участникше-влаклан марий ўдырамаш-влакын могай жапыште могай вургемым чийымышт нерген ойлен. Марий кудо шке презентацийжым «Рвезылык» вокальный ансамбльын ўстел коклаште мурымо уна муро дене иктешлен. Тиде творческий коллективын эн шоҥго участницыже Людмила Игинашева лийын.
Презентаций-влакым иктешлыме жапыште чылан кандырам куштымашке ушненыт. Пайремын унаже-влак тыгак пошкыртла, татарла, рушла кумылын куштеныт.
Фольклор пайремыште корак-влак «Оръеҥын шондыкшо» номинацийыште палемдалтыныт. Монар сельсовет СП администрацийлан «Айык ял - 2022» республиканский конкурс кышкарыште эртыше «Поч леведышет, шондык» фольклор пайремыште чолган участвоватлымылан Тауштыме серышым кучыктымо.
Концерт программе деч вара уна-влакым верысе школышто пукшеныт, турист маршрутысо объектлашке экскурсийым эртареныт.
Светлана ТОЙМУРЗИНА.