Келшымаш
-2 °С
Лум
Все новости
Тӱрлӧ
2 Кылме 2022, 10:47

Куан жапше шукырак

Ирсай ялыште илыше Магомед ден Валентина Давудовмыт еш илышын пиалже нерген палдареныт

Куан жапше шукырак
Куан жапше шукырак

Калык-влакын икоян улмо кечышт вашеш ме шуко икшыван, пиалан интернациональный еш дене палдарена.
Еш оза Магомед Давудов национальностьшо дене цахурец улеш. Цахурец - Дагестаныште илыше лезгин тўшкашке пурышо ик калык. Магомед Дагестан гыч улеш, профессийже дене облицовщик. Уфа олаште стройкышто пашам ышта. Сурт оза вате Валентина руш ўдырамаш, Мишкан районысо Накаряк ялын шочшыжо. Декрет отпускыш лекмешкыже Уфа олаште «Пятерочка» магазиныште кассир лийын ыштен. Шуко икшыван еш 2009 ийыште Валентинан шочмо кундемышкыже пєртылын. Ончыч илыме верым айлен иленыт, а 2013 ийыште пӧртым налыныт, тудым уэмденыт, коммуникацийым пуртеныт.
Мыйын мийымем годым чумыр еш мӧҥгыштыжӧ ыле. Еш вуй кугурак эрге Салман дене пєрт леведышым уэмденыт - тошто леведышым рончен, профнастилым вакшыныт. 13 ияш Хадижа оралтыште 11 тылзаш Исмаил шольыжым модыктен. Сурт оза вате Валентина Леонидовна кухньышто шогылтын, тудлан лу ияш Минаса ўдыржӧ полышкален. Йоча пӧлемыште шымияш Сулейман, вич ияш Амина да кум ияш Аиша модыныт.
- Мый изем годымак паленам, мыйын ешем кугу лиеш, - манеш шуко икшыван ава. - Мый шкеже ача-авамын кудымшо икшывышт улам. Чаманаш веле кодеш, авам мый дечем уныкам-влакым вучен шуктен огыл. Икшывына-влак ачашт могырчынат куваваштым ужын огытыл. Марием ешыштышт эн изи лийын. Кугурак икшывына-влак Салман, Хадижа да Минаса ик кочаштым ужыныт. Мариемын ачаже колымыж деч ончыч 2013 ийыште толын ыле. Теве тыге, икшывына-влакым коча-кувава деч посна куштена.
2019 ийыште Валентина Давудова «Материнская слава» медаль дене наградитлалтын. Шуко икшыван еш награда нерген ок шоно, шке икшывыштым чын корно дене каяш, пашам йӧраташ туныктат. Но медаль садак чоным ырыкта, вет тудо шуко икшыван авам кумылаҥдыме эн кугу йӧн. «Материнская слава» медаль икшыве-влакым сайын ончен-куштышо шуко икшыван авалан пуалтеш. Давудовмыт еш государство деч шуко икшыван еш-влаклан логалшаш полышым тўрыснек налеш. Но ача-ава утларакшым шке вийыштлан ўшанат. Давудовмыт пакчам шындат, садым куштат, ныл ушкалым, кум презым, 100 чывым, тагам да шорык-влакым ашнат. Ача-ава шым икшывыштлан чыла шотыштат пример лияш тыршат. Тыршышан да пашам йєратыше ача-авам ончен, икшыве-влакат пашалан тунем кушкыт. Валентина Леонидовна межым шўдыра, пидеш. Ӱдыр-влакымат кид пашалан туныкта. Кухньышто Хадижа ден Минасан пидме, шокшо атышєрым кучаш келыштарыме кучем-влак кечат. Вич ияш Аминат акаж-влак деч почеш ок код, крючок дене пидаш тунемеш.
Тиде ешыште куан жапше шукырак. Чылан пырля пашам ыштат, канат. Йокрокланаш жапышт уке. Пиалан еш илыш дене 16 ий илат. Самырык мужыр 2006 ийыште никахым эртарен, ик ий гыч ЗАГС-ште возалтыныт. Тений кеҥежым нуно хрусталь сўаным - латвич ий пырля илымым палемденыт. Вате марий икте-весым аклен, вашла полышкален, келшен илат.
- Самырык еш-влаклан могай тыланымашда лиеш? - йодам оза вате деч.
- «Интернациональный еш» манме муткылдыш мыйым изишак ӧрыктара, - манеш Валентина Давудова. - Еш - эн ончычак ўшанымаш да ответственность. Вашкылыште нигунам йӧратымаш тулым да йоча шарнымашым мондаш огеш кўл. Нелемдаш тыршаш огеш кўл. Чылажымат куштылгын ончет гын, илашат куштылгырак лиеш. Раш каҥашым пуаш неле. Мый, мутлан, Магомедын ватыже лияш келшымеке, тудын йўлажым налынам, икшывына-влакымат ислам йўла почеш куштена. Мемнан ешыште тўҥ верым умылымаш да вашла полшымаш налын шога. Мый, можыч, тошто койышан айдеме улам, но ешым погымаш - пеш ответственный ошкыл, тетла шеҥгек чакнаш ок лий, эре ончык гына кайыман. Мемнан икшывына-влак йӧратымаште кушкыт. Икшывына-влакат келшен илат, кугуракше изиракшым пагала, акла, арала. Салман 9 классыште тунемеш, Хадижа - шымше, Минаса - нылымше, Сулейман - икымше классыште. Амина подготовительный классыш коштеш. Мӧҥгыштӧ мый денем кум ияш Аиша да 11 тылзаш Исмаил улыт. Марием пашаште улмо годым мыланем икшывем-влак, кажныже вийже шутымо семын, полшат.
Шуко икшывым кушташ - кугу паша. Давудовмыт умылат, йоча-влак сай ден осалым, мом ышташ лиймым да ок лийым эн ончычак еш кєргыштє пален налыт. Сандене нуно шке икшывыштлан эре пример лияш тыршат…
Светлана ТОЙМУРЗИНА.

Куан жапше шукырак
Куан жапше шукырак
Автор:Светлана Тоймурзина