Келшымаш
+24 °С
Йӱр
Все новости
Тӱрлӧ
12 Шыжа 2022, 10:21

«Ветеран сурт-оралте - 2022»

Районный конкурсым иктешлыме

«Ветеран сурт-оралте - 2022»
«Ветеран сурт-оралте - 2022»

Мемнан районышто поро йўлашке савырныше «Ветеран сурт-оралте - 2022» конкурс эртен. Тушто 17 сурт участвоватлен. Конкурсышто участвоватлаш йодмашым пуышо-влак тудлан кугу ответственность дене ямдылалтыныт.
Чыла озанлыкыште порядке: клумбылаште пеледыш-влак пеледыт, пакчаште пакчасаска ден емыж-влак кушкыт, планировкым моштен ыштыме. Суртышто вольык, сурт кайык-влак улыт, мўкшымат ончат. Ик суртышто кум тукым икте-весылан полшен илымым ужын чон куана (Михайловмыт, Аптитевмыт, Саметовмыт). Мемнам марла тувырым чиен вашлийыныт (Л. Салиева, З. Янгубаева, Л. Игинашева, Н. Васильева, Саметовмыт чыланат).
Михайловмыт кок икшывым куштеныт, ынде уныка-влакым ончаш полшат. Дима армийыште служитлен пєртылын, Тимофей кызыт служитла, Ангелина 7 классыште тунемеш. Суртышто поро шўлыш озалана. Сурт оза вате Анастасия Сергеевна ден Надежда шешкыже келшен илат. Сурт оза Сергей Михайдарович кужу жап черле кийыме деч вара пареммыжлан чылан куаненыт. Суртышто шокшо, оралтыште йоҥгыдо, пакча тич саска, емыж кушкыт.
Южо еш ятыр ий ӧрдыж велыште илен да шоҥгемме велеш шочмо кундемышкыже пӧртылын (Гафаровмыт, Иксановмыт, Салиевмыт). Пакчам шындат, колым кучат, мўкшым ончат. Сергей Семенович Салиев районышто эн ончычак спортын у видше дене - городки дене заниматлалташ тўҥалын. Моло-влакым ушен, ынде районын командыже республиканский таҥасымашлаште участвоватла. Салиевмыт 53 ий пырля илат, кызытат самырык пагытысе гаяк вашла йєратат, икте-весым пагалат, аклат. Шочмо ялыштым, пошкудыштым жаплат, мўкшым ончат.
Андреевка ялыште Чорай школын ончычсо выпускницыже Светлана Алиева ден Кемий школышто пелашем Иван Яваевичын ончычсо тунемшыже Геннадий Иксанов дене вашлиймаш куаным шочыктен. Нуно йўдвел кундем гыч пӧртылын, Светланан ача- ава суртым тўзаташ пижыныт, шоҥго аваштым ончат. Воктечак йогышо эҥерым пўяленыт. Ынде тушто пуш дене кошташ, колым эҥыраш лиеш. Емыж пушеҥге ден вондерлам шынденыт.
Андреевка ялыште дачник-влак дене пырля 15 сурт уло. Тынар суртлан 4 пўя. Ялыште илыше-влак Светлана Ямбаевнан вуйлатымыж почеш клубым олмыктеныт, библиотекылан книгам погеныт, йоча площадкым ыштеныт. Чыла пашам тўшкан шуктат. 2021 ийыште яллан 100 ий теммым да Сеҥымаш кечым кумдан палемденыт.
Мемнан мийымына годым Галина Яшкина пўя воктене колым эҥырен шинча ыле. Нунын вичашт тич вольык, пакчаште арбуз ден кавун кушкыт, книгам лудаш йӧратат. Илалше-влакын пашам йєратымышт да чолга илыш позицийышт куандара (В. Аптиева, Н. Васильева, З. Янгубаева, Л. Игинашева). Людмила Игинашеван оралтыште чыла вере арулык озалана.
Айдемын фантазийжылан мучаш уке. Южо озан сурт оралтыже тўрлӧ мозаика дене сӧрастаралтын (Михайловмыт, Янгубаевмыт). Зинаида Янгубаеван марла вургеман курчак-влак выстака куандарыш. Кок ий ончыч Зинаида Финляндий да Эстоний гыч ученый-влакым вашлийын. Людмила Игинашева, Зинаида Янгубаева да Раиса Аптыкаева кузе моторын да яндарын мурат!
Байгазовмыт вольыклан посна вичам чоҥеныт. Кажне чонанлан йомакысе гай посна пӧрт. Пӧртыштат дизайнже ойыртемалтше. Петровмытын кугу клумба-влак, пакчаште пареҥге, пакчасаска. Ик шўк пырчымат от уж. Нуно шуко вольыкым ашнат. Надежда Васильеван планировкыжо куандара, таптыме капка, беседка, лўҥгалтыш, шуко пеледыш. Оралтысе тротуарыште йолчиемым кудашын кошташ лиеш. Тимофей уныкаже куваваж деке чўчкыдын унала толеш, икымше полышкалышыже улеш. Ялкаевмытын пакчаште шуко пакчасаска, теплицыште болгар пурысын шуко улмыжо ӧрыктарен-куандарыш. Р. Аптыкаеван суртшо образцовый улеш. Пӧртын проектше чот шоналтын. Оралтыже да пакчаже сайын планироватлалтын, вольыкым шуко ашнат. Сурт оза вате Раиса Максимовнан пашам йӧратымыже да Эдуард эргыжын мастарлыкше вик койыт. Саметовмыт еш мемнам тичмаш состав дене вашлийын. Кугу беседка, теплица, пум пўчкеден оптымо тротуар, палисадникыште пеледыш-влак пеледыт, туштак уныка-влак шыргыж шогат. Тиде суртышто Саметовмытын кум тукымышт ила.
Ашиевмытын оралтышт, пакчашт сайын планироватлалтын. Вик коеш, оза-влак шке оралтыштлан кугу верым ойырат. Тыршымын лектышыже пакчаште, теплицыште куандара. Комиссий член-влакым Нуртдиновмытын мўкш пакчашт ӧрыктарен. Тушто 112 мўкш омарта. Тыште ме сурт озан Светлана ўдыржым вашлийна. Икмыняр ий ончыч ме тудын дене РОНО-н методкабинетыштыже пырля ыштенна. Альберт веҥыж ден Диана уныкаштат тыштак улыт. Ирсай сельсоветысе тўҥалтыш ветеран организацийын председательже В. Аптиева кӧршӧклаште петунийым кушта. Чылаже 60 сорт, моло пеледышат шуко. Нунын кок теплица. Тушто кияр, помидор-влак умен кушкыт. Посна йыраҥыште арбуз ден кавун, лўмын ойырымо верыште икмыняр урлык виноград кушкыт. Пакчаште йошкар ушмен, ковышта, шоган йыраҥ-влак волгалт шинчат. Тиде суртышто Аптиевмытын кум тукымышт ила. Андрей эргышт ден Юлия шешкышт, 3 уныкашт пеш поро улыт. Валентина Ахметзяновна кид пашам ышташ йӧрата - урга, пидеш, тўрла, квилинг дене заниматлалтеш. Оза вате шке выставкыжым пӧрт кӧргыштак ончыктыш.
Тиде конкурслан СП вуйлатыше-влак Г. Байдимиров ден Ю. Яншаев пеш ответственно ямдылалтыныт. Тўҥалтыш ветеран организаций-влакын председательышт Т. Изибаева, А. Сайсанова, Т. Ташбулатова, И. Шамукаева, Г. Зайнитдинов шке кундемыштышт мемнам ужатен коштыныт.
Конкурсым иктешлыме годым М. Хановын вуйлатыме комиссий член-влак ик йўк дене икымше верым Валентина Ахметзяновна ден Анатолий Павлович Аптивмытлан (Ирсай ял) пуэныт. Кокымшо вер Еремей Павлович ден Галина Николаевна Яшкинмытлан (Андреевка ял) логалын. Кумшо верым Сергей Семенович ден Люба Ионовна Салиевмыт (Кемий ял) налыныт. Конкурсышто участвоватлыше моло сурт-влак тўрлӧ номинацийыште палемдалтыныт. «Эн образцовый сурт-оралте» Владимир Ванюшевич Байгазов ден Марина Николаевна Кощееван (Кўшыл Шогертен), «Эн благоустроенный сурт-оралте» Мишкан гыч Надежда Викторовна Васильеван, «Эн пеҥгыде ветеран сурт-оралте» Ардаш гыч Раисия Максимовна Аптыкаеван, «Кум тукымын пеҥгыде кылже» Чорай гыч Раиса Ивановна Саметован, «Пашам йӧратыше, чолга илыш позиций» Корак гыч Людмила Янситовна Игинашеван, «Суртышто стиль да гармоний» Кемий гыч Галина Яковлевна Ашиеван, «Тукым-влак кокласе кыл» Сергей Михайдарович ден Анастасия Сергеевна Михайловмытын (Монар), «Мастар кид да сурт-оралтым творческий оформитлыме» Корак гыч Дмитрий Янчиевич ден Зинаида Николаевна Янгубаевмытын, «Шочмо кундемыш пӧртылшӧ» Геннадий Аспаевич ден Светлана Ямбаевна Иксановмытын (Андреевка), «Мўкш ончымаште сеҥыше» Марат Нуриярович ден Флида Гасимзяновна Нуртдиновмытын (Кугу Шаде), «Вольык ончымаште сеҥыше» Олина Петровна ден Станислав Андреевич Петровмытын (Йылыш), «Пакча саскам куштымаште сеҥыше» Александр Ямурзинович ден Людмила Михайловна Ялкаевмытын (Кемий). Конкурсышто участвоватлымылан тыгак палемдалтыныт Тамара Владимировна Зарипова, Гаян Баянович ден Гульчира Мутахаровна Гафаровмыт (Кигазытамак).
Комиссий член-влак конкурсышто участвоватлыше-влаклан пеш кугу таум каласат. Чылаштлан пеҥгыде тазалыкым, еш пиалым тыланат.
Рита ЯЛАЕВА.

«Ветеран сурт-оралте - 2022»
«Ветеран сурт-оралте - 2022»
Автор:Фирдаус Кадикова