Шўдымшӧ йоча шочын

Тудо самырык еш Илья ден Карина Чураевмытын икымше икшывышт лийын. Аза 5 августышто Уфа оласе ик роддомышто 12 шагатат 05 минутышто шочын. Шочшо азан нелгытше кок килограммат 830 грамм, кужытшо 47 сантиметр. Самырык ача-ава эргыштлан Платон лўмым пуэныт.
Тиде лўм озажлан кумда умылымашым, виян койышым да пашам йєратымым пєлекла. Тудо грек мут «платос» гыч шочын. Тыгеракын, Платон лўмым кусараш гын, тудо «лопка вачан», «кумда» манмым ончыкта. Мут толмашеш, акрет грек философ Платон тиде лўмым кумда, лопка туп-вачан улмыжлан налын. Европышто Платон лўм кумдан шарлен. Российыштат тиде лўм вашталтде кучылталтеш.
Кўшыл Шогертен ялын шочшыжо Карина Аркадьевна ден Мишкан рвезе Илья Ильясович икымше икшывыштым чот вученыт.
- ЗАГС отделыш кайыме годым мемнан Платонна Мишкан районышто Россий Федерцийын шўдымшє гражданинже лиеш манын шоненат огынал, - куанжым шылтыде ойла пиалан ача.
Самырык Чураевмыт ешым эрге шочмо дене саламлена! Тек йочан илыш корныжо пиалан лиеш! А ешлан пиалым да йєратымашым тыланена!
Палемден кодаш кўлеш, Мишкан районышто «Рождение ребенка» суперсервис кышкарыште актовый запись икымше гана ышталтын.
Актым 2022 ий 17 авугстышто возымо. «Рождение ребенка» суперсервис кышкарыште аза шочмым регистрироватлымашын ик ойыртемже - ача- аван ЗАГС отделыш толмышт деч посна ышталтеш. Йодмашым государственный услуга портал гоч пуыман. Тыгай йӧн кок случай годым гына лиеш - аза шочмо жаплан бракыште улшо ача ден аван пырля пуымо йодмашышт почеш да азан ачаж дене бракыште шогыдымо аван йодмашыже почеш.
Республикыште тиде программа тений июльышто стартым налын. Мишкан районышто тиде суперсервисым практикыште кучылтмо икымше случай.
- Кызыт азам регистрироватлыме процесс чот вашталтын, - ойла ЗАГС отдел начальник Алена Терегулова. - Ынде тиде пашам тўрыснек электрон йӧн дене ышташ лиеш. Тидлан тыгай ошкыллам эртыман: роддомышто аза шочмо годым аван келшымыж почеш азалан электронный медицинский документым ыштат, тудо Госуслугышто аван личный кабинетышкыже пура; аза бракыште шочын гын, тиде процессыште ача участвоватла, Госуслугышто йочалан лўмым пуа. ЗАГС орган аза шочмо нерген пурышо йодмаш да электронный медицинский документ почеш ЗАГС-ын единый государственный реестрыштыже аза шочмо нерген гражданский актлан цифровой записьым ышта; азан аважын личный кабинетышкыже азам регистрироватлыме нерген увер пура.
Госуслуга порталыште медицинский свидетельствын да цифровой профильын данныйышт шочмо нерген йодмашым возаш кучылталтеш. Ача-авалан тидым пеҥгыдемдаш, азалан лўмым пуаш да ЗАГС органым ойыраш гына кодеш. Варажым ЗАГС ача-ава деч поснак аза шочмым регистрироватла. Аза шочмо нерген возымын реквизитше порталыште пользовательын личный кабинетышкыже пєртылеш. Тудо моло государственный услугылан да социальный полышлан йодмашым пуымо годым кучылталтеш.
Вес йӧнат уло. Азан аваже аза шочмо годым электронный медицинский документым ок ыште гынат лиеш: тудлан тудым кагаз дене пуат. Тудын денат Госуслуга гоч але ЗАГС органышке шке миен йодмашым возаш лиеш.
Тыгеракын, кагаз документ дене пашам ышташ тунемында, тиде права дене пайдаланен кертыда. Аза шочмо нерген гербовый документым ача-ава, кумылышт почеш, ЗАГС отделыш миен налын кертыт.
Светлана ТОЙМУРЗИНА.