Цейтнот жапыште

Шукерте огыл районыштына строитель-влак профессиональный пайремыштым палемденыт.
Эртыше номерыште ме Мир уремысе 32 №-ан пӧртым чоҥымо нерген возенна ыле. Тушто паша чынжымак сайын шукталтеш, строитель-влак шке пашаштым тыршен ыштат. Но вес объектыште – 7 №-ан пӧрт олмышто паша чарнен шогалын.
Мый тиде пӧртыштӧ ожнырак 7 ий иленам. Лач тушто икшывем-влак шочыныт. Поро пошкудем-влак иленыт – шочыныт, коленыт… Южо пошкудем шоҥгемын колен, южыжо – нелын черланен. А кӧлан дыр уда койышыжо вес тўняш жап деч ончыч каяш полшен. Мый Мир уремысе 7 №-ан пӧртыштӧ илыме самырык жапым эн пиалан жапемлан шотлем. Мыйын йырем тиде пӧртыштӧ поро чонан, алал кумылан еҥ-влак иленыт, полыш кўлын гын, чыланат кумылын полшеныт, ӧрдыжеш нигє кодын огыл.
Ончычсо госбанк ваштареш шогышо кок пачашан ужар пӧртым уже икмыняр ий ончыч рончымо. Тудет палын тоштемын ыле. Пошкудем-влакым чылаштымат вес – сай пєртыш кусареныт. Туге гынат, мый чылаштымат але мартеат поро пошкудем-влаклан шотлем. Кызыт тиде пӧрт уке, тудын олмышто строитель-влак вес зданийым чоҥаш тыршат, но ала-можо нунын миен ок лек.
Тошто зданийым экшык деч посна ронченыт. Строительный участкым, кўлеш семын, йыр печен налыныт. Варажым котлованым кўнченыт. Но шошым тиде котлованыш вўд писын темын да тудет изи огыл ерыш савырнен. Молан тыге лийын? Вашештена – строитель-влак верын ойыртемжым шотыш налын огытыл – верже тушто вўдан. Рашрак лияш гын, котлован вўдкорно олмышто кўнчалтын. А вўдкорным кораҥдаш гидроскопный траншей кўлеш. Строитель-влак гын, айда лийже маншыла, нимом шотыш налде, виклан котлованым кўнченыт. Ожнырак шошо вўд писын гидрослив дене йоген каен – строитель-влак шонен моштеныт улмаш. Кызытсе чоҥызо-влак гын вўд мландыш шыҥымым да котлован кошкымым вучат улмаш. А вет тудет кошкен ок шукто – шыже йўр-влак тўҥалыт. Тидлан кӧра пӧртым чоҥымо жап утыр да утыр шуйна. Стройка кєргыштат арулык уке манаш лиеш.
Южо еҥже каласен кертеш: «Стройка годым могай арулык лийын кертеш?». Вашештем – арулык кеч куштат лийшаш, вет тудо пашаеҥ-влакын чын сыныштым ончыкта. 32 №-ан ден 7 №-ан пӧрт-влакым ик жапыште чоҥаш тўҥалме. 32 №-ан пєрт поҥго гай кушкеш, манаш лиеш. Пашаеҥ-влак тушто кас рўмбалге марте пашам ыштат, каскым упшалше да нарынчалге жилетым чийыше строитель-влак куткыла шолыт. А 7 №-ан пӧрт олмышто ик еҥат ок кой, техника йўкат ок шокто. Воктекыже мияш гын, корем чоргымо йўкым гына колаш лиеш. Кызыт тушто дренажым ыштышын койыныт. Но тудет ситыдымашым кораҥден ок сеҥе. Котлованыште кызытат вўд шинча. Тиде кукшо игечылаште тыгай сўрет. А йўр тўҥалеш гын? Котлован йыр фундамент блок ден моло конструкций-влак кият. А специалист-влак ончыл кечылаштат ышт кой, кызытат укелыт. Мыйын мийымем годым коптерка ден вагончик-влак омсалаште сура-влак кеченыт. Стройка олмышто корем веле шып шортын. Очыни, але мартетат шортеш.
Но мый ўшанем: корем вашке шортмыжым чарна да тиде олмышто тўрлє техника мўгыраш тўҥалеш. Но йомдарыме жапым «авральный темп» дене покташ перна. Тидын годым чыла йодмашым шуктат гын сай леш ыле. Вет объектым идалык мучаш марте сдатлышаш улыт.
Вениамин КОНДОГИН.