Тек газ лиеш!

Икмыняр кече ончыч эрдене ял мучко техника йўк шергылтын. Ялыш газым пуртымо нерген увер ончылгоч шарлен гынат, паша тыгай йўк дене тўҥалмаш тып-тымыкыште илыше калыкым изишак ӧрыктарен.
Газым ялыш пуртымо пашам Давлекан селасе «Оникс» ООО шукта. Тиде организаций «Газпром газораспределение Уфа» ПАО-н Пўрӧ оласе филиалжын ужашыже улеш. Пашам Ильдар Хайруллин вуйлата.
Организаций гыч пуч-влакым ондак Сабай ден Урьяде яллаште пыштен. Ынде мемнан ялышкат толын шуыныт. Сабайыште тений газым 10 суртыш пурташ палемдыме, Урьядыште – 4 суртыш. Тиде, конешне, шагал, но тўҥалтыш веле. Вет чылаштын тенияк газым пурташ оксашт ок сите – идалык наре погаш кўлеш. Туге гынат, газ пуч-влак ял мучко пышталтыт. Моло еҥ-влак тудым йӧнышт лекмеке пуртат.
Газ пуч-влакым оптымо паша кузе шукталтмым рашемдаш манын мый мастер Руслан Гильмутдинов дене мутланышым.
- «Оникс» ООО Газификаций программым Мишкан районышто илышыш шыҥдара. Газопровод газым ныл илемыш пурташ йєным ышта. Пўртўс газ ял калыкын илышыжым саемдаш полшышаш. Ме кызыт Баш-Байбак ялыште пашам ыштена, варажым Руш-Байбакыш куснена. Пашам август мучаш марте пытарышаш улына. Нимогай экшык ден нелылык ыш лек, чыла план дене келшен ышталтеш. Ялыште техника гыч 2 экскаватор да бурилка пашам ыштат. Пашаеҥна-влак пашаштым чыланат сайын палат. Мутлан, бурильшик Алик Тибикеев тиде пашам уже 13 ий ышта. Тыгак слесарь Эдик Ханнанов ден сварщик Раиль Сахибгареевым палемден кодымо шуэш. «Хитачи» экскаватор дене Данил Ибраев тырша.
Техника чынжымак куатле улмаш. Нуно пашам ышташ тўҥалмеке, пошкудо йоча изишак лўдӧ. Но ик жап гыч лўдмашым монден да пашам кузе ыштымым єрын эскераш тўҥалын. А єраш вер уло - Данил Ибрашев экскаваторын кугу кольмыж дене совла ден пашам ыштымыла ышта.
- Ик еҥ тынаре шуко пашам ышта, эше тынаре шокшо игечыште, - єрын ойла ялыште илыше Радиф павай. Тудат экскаватор пашажым ончаш лектын улмаш.
Техника мемнан сурт воктеке толын шумеке, пєртна, лўдын чытырымыла, чытырналташ тўҥале. Тиде татыште мый ала-молан виклан сар нерген кино-влакым шарналтышым да шоналтышым: «Тыныс жапыште илымыланна Юмылан кугу тау!». А техника мўгырымаш мыланна куаным веле конда – вашке суртыштына газ лиеш! Вет тыгай пиал нерген ме икмыняр ий ончыч шоналташат тоштын огынал. Суртышко газым пуртымаш омына дене веле койын.
Чылажат лишыл жапыште лийшаш, кызытеш гын ме шукерте вучымо пашам мучашлымым вучена. А уремыштына «асфалетым» (икшывына-влак лач тыге ойленыт) вакшыт гын, йӧршын пиалан лийына. Тунам ялыштына чылт олаште илымыла илаш тўҥалына ыле.
Залия ГАТИНА.