Профессионал-влак пашаштым сайын палат

Пєрт зданий лош шелмылан кєра тудым шошымак рончаш пижме. Рончен пытарымеке, у пєртым чоҥаш тўҥалме.
Кызыт тиде олмышто уже у пӧртым чоҥымо паша шукталтеш. Кугу самосвал-влак стройматериалым чарныде шупшыктат. Оралте гыч рокым шўдырат. Тошто зданийым рончымо материалым строитель-влак корным тєрлаш кучылтыныт.
Паша объектыште 8 шагат эрденак шолаш тўҥалеш. Шукерте огыл строитель-влак цокольный пачашым нєлталыныт.
Теве капка почылтеш да мый объект кӧргышкӧ пурем. Тушто чӧгыт кырыме, командым кычкырыме йўк-влак шоктат, тыштат-туштат нарынчалге жилет-влак койыт, механизм-влак мўгырат, кран стройматериалым строитель-влак деке нєлта. У еҥым ужмеке, каменщик-влак ик жаплан лым лийыч да уэш пашаштлан пижыч. Нуным, очыни, вачем гоч кечыше фотоаппарат ӧрыктарен. Виклан шижылтеш – йот уна-влак объектышке шуэн пурат.
Строитель-влак кокла гыч крановщик эн чулым улмаш - кабиныжым почо да виклан мыйын воктеке тєрштен волыш. Тудо кӧ улмем виклан рашемдаш шонен пыштен улмаш. Пален налмеке, кӧ деке миен йодыштшашым умыландарыш. Тораште огыл прораб Сергей Десяткин шога ыле. Лач тудо мыйын гидем лие. Сергей Валерьевич, технический документацийыш ончалде, мылам чыла раш умылтарыш, тўрлӧ цифр-влак дене палдарыш. Чын лияш гын, тудын ойлымыж гыч ушыштем шагал ужашыже кодо. Мом шарнем – пӧрт кум пачашан лиеш, кажне пачашыште - 8 пачер дене, пєртым посна электрический электрокотельный ырыкташ тўҥалеш. Пачер-влак кугу гына лийшаш улыт. Тўрлӧ пакчасаска ден емыжым шындаш мланде участкыланат вер кодалтеш.
У объектым Уфа оласе «Ремгорстрой» ООО чоҥа. Сергей Валерьевичын мутшо почеш, пєртым чоҥымаште уста специалист-влак тыршат. Поснак каменщик-влак Александр Михайлов ден Алексей Иликаевым палемдыш. Пашам тыгак Евгений Бикнязевын бригадыже сайын ышта. Растворым объектыш Благовещенск ола гыч кондат. Кермычым – Кабак гыч.
Палдарен кодыде ок лий – тиде олмышто шогышо ончычсо зданий арам шелын огыл. Верже вўдан улмаш. Сандене зданийым чоҥаш тўҥалме деч ончыч мелиоративный – вўд корным кораҥдыме пашам шукташ пернен. Погынышо вўдым тулен йоктарыме пашат шагал огыл жапым налын. Но тиде паша шеҥгелан кодын, ынде у зданийым чоҥаш нимо ок пулаштаре.
В. КОНДОГИН.