Келшымаш кыл пеҥгыдемшаш

Делегацийышке тыгак Марий Эл правительство председательын икымше заместительже Михаил Васютин да Марий Эл вуйлатышын советникше Наталья Помозова пуреныт.
Марий Эл гыч уна-влакым Мишкан селашке Башкортостан Республик вуйлатышын администрацийже вуйлатыше Максим Забелин, Башкортостан Республикысе культура министрын икымше заместительже Наталья Лапшина да Мишкан район МР администраций вуйлатыше Павел Трапезников вашлийын конденыт.
Поро йўла почеш, уна-влакым Марий историй да тўвыра рўдер ончылно кинде-шинчал дене вашлийме. Варажым нунылан «Марий чодыра» историко-культурный паркым ончыктымо. Кўсото сынан парк дене историй да тўвыра рўдерын тўҥ специалистше Алексей Ибулаев палдарен. Вет парк лач марий кумалтыш-влак дене палдараш ышталтын.
«Марий чодыраш» пурен лекмеке, уна-влак рўдерышке эртеныт. Тушто нунылан верысе интерактивный музейым, звукозапись студийым да ремесло мастерскойым ончыктымо.
Тылеч вара конференц-залыште марий ончылеҥ-влак дене вашлиймаш эртен. Вашлиймаште модератор пашам Башкортостан Республикысе «Эрвел Марий» региональный марий национально-культурный автономийын председательже Виталий Ялаев шуктен.
Вашлиймаште Юрий Зайцев «Эрвел Марий» национально-культурный автономийын пашажым кўкшын аклен да эрвел марий-влакын ваш келшен илымыштым, чолга улмыштым палемден. Тылеч вара кок республик да нине республикылаште илыше марий-влак коклаште вашкылым пеҥгыдемдыме, марий йылмым, тўвырам, йўлам аралыме да вияҥдыме нерген мутланыме. Вашлиймашке мийыше-влак ятыр йодышым пуэныт. Эн ончыч Башкирийысе марий школ-влаклан марий йылме да литератур дене учебник-влакым йодыныт. Вет йоча-влакым туныкташ учебник-влак огыт лий гын, марий йылмым аралыме да вияҥдыме нерген мутланышашат уке. Моло йодыш-влак БашГУ-н Пўрӧ оласе филиалыштыже марий йылме да литературым туныктышо-влакым ямдылыме, Башкирийысе да Марий Элысе творческий коллектив-влак коклаште творческий кылым пеҥгыдемдыме, икте-весе деке гастрольный тур-влакым эртарыме, Башкирийыште Марий Эл телевиденийын передачыже-влакым ончыкташ тўҥалме, Башкирий гыч Йошкар-Олашке автобусный рейс-влакым пєртылтымє дене кылдалтыныт.
Йодыш-влак деч вара Марий Эл вуйлатышын пашажым жаплан шуктышо Юрий Зайцев Башкортостан Республик вуйлатышын администрацийже вуйлатыше Максим Забелин виклан вашмут-влакым пуэныт. Мутлан, марий йылмым туныкташ учебник-влак ситыдымашым колмеке, Юрий Зайцев тыгерак вашештен: Марий Элыште тудын кўштымыжӧ почеш паша уже тарваталтын, учебный пособий перечень ышталтеш. Палдарена: республикыштына тачысе кечылан марий йылмым 4000 утла йоча тунемеш. Ю. Зайцев ден М. Забелин автобус рейсым пӧртылтымӧ нергенат йодышым тергаш сєреныт. А М. Васютин Йошкар-Олаште лишыл жапыште у марий паркым ышташ да тушто посна унагудым чоҥаш палемдыме нерген ойлен. Икманаш, чыла сай лиеш гын, Йошкар-Олашке автобус дене шинчын каен, марий паркыште моло марий-влак дене пырля кушталтен да икмыняр кече посна унагудышто илен кертына...
Йодыш-влаклан вашмутым пуымеке, делегат-влак икте-весыштлан пєлекым кучыктеныт. Юрий Зайцевлан, поро йўла почеш, марий теркупшым пєлеклыме.
Вашлиймаш мучаште Юрий Викторович Марий историй да тўвыра рўдерын пагалыме унаже-влак книгаштыже тыланымашым возен. Мероприятий пырля возалтмаш дене мучашлалтын.
Вячеслав КАМИЛЯНОВ.