Сулей кокай ик курым ила

Сулей Аксаевна Дюртюли деч тораште огыл верланы­ше ялыште шочын-кушкын, Надежда уныкажын мутшо почеш тиде ял Ивач-Урман манылтын (очыни, Йы­вачял). Сулей кокай изинек чолга да чулым, чыла пален налаш тыршышан лийын. Ачаж ден аважлан кумылын уло сомылым ышташ пол­шен. Жап шумеке, тунемаш пурен да шочмо ялыштыже ныл классым пытарен.

16 ийым темымеке, ўдыр шоч­мо ялыштыже колхозышто пашам ышташ тўҥалын. Но мо пашам ыштымыжым Сулей кокай умылта­рен ыш керт, але мый шым умы­ло – ийготшо шагал огыл улмылан кӧра ойлымыжым коклан умылаш нелырак. Илыш-корныж нерген утларакшым Надежда уныкажын ойлымыж гыч пален налынна. Теве мом тудо ойлыш:

- Кувавам марлан вараш лек­тын. Ты жаплан тудлан уже 30 ий лишемын. Кочана - Борис Апты­каевич Антонов. Тудо кужу жап Ташкент олаште прокурор лий­ын ыштен. Ешыштышт вич ик­шыве шочын-кушкын. Чаманаш кодеш, кочана ош тўня дене пеш эр чеверласен. Кувавайлан икшы­ве-влакым йол ўмбаке шогалтыме верч вийже ден тазалыкшым ча­маныде тыршаш пернен.

Тудын эн кугу Валя ўдыржӧ кы­зыт Кугу Соказа ялыште ила (туш­ко вич ий ончыч илаш куснен), тылеч ончыч Стерлитамак олаште илен. Кокымшо Аля ўдыржӧ Кры­мыште ила, Лена – Тюменьыште. Лиза ден Лена ўдыржӧ-влак, ча­манаш кодеш, ош тўня дене че­верласеныт.

Сулей Аксаевна ўмыржӧ муч­ко колхозышто пашам ыштен, сар жапысе да сар деч варасе шужем ийла-влакым сайын пала. Чыла нелылыкым сеҥаш чолгалыкше да чытен моштымыжо полшеныт. Кы­зыт тиде ўдырамаш йыр кугу еш чумырген. Тудын ныл икшывыже, 13 уныкаже, 27 кугезе уныкаже, 1 кок гана кугезе уныкаже улыт. Кы­зыт Сулей Аксаевна Надежда уны­каж дене ила. Илыме условийже сай. Кувавам тыршен ончат.

Шўдє ияш юбиляршам юбилей­же дене саламлаш Мишкан район МР администраций вуйлатыше П. Трапезников ден Мишкан рай­онысо ветеран-влак совет пред­седатель Ю. Балахнина миеныт. Уна-влак тудлан шерге пӧлекым пӧлекленыт да пеҥгыде тазалы­кым, суапым, родо-шочшыжо да лишыл еҥже-влак воктене пиалан илышым илаш тыланеныт.

Сулей Аксаевна тиде кечын ты­гак Башкортостан Республик вуй­латыше Радий Хабиров да Россий Президент Владимир Путин лўм дене толшо салам серыш-влакым налын. Нине серыш-влакым туд­лан Мишкан район муниципаль­ный район вуйлатыше Павел Вла­димирович Трапезников кучыктен.

- Тендан верч илем, - ойла Су­лей Аксаевна Надежда уныкаже да кугезе уныкаже-влаклан.

Шомакше чын. Тудо илыш- ыжын утларак ужашыжым шке­тын илен эртарен да эре икшы­выже да уныкаже-влак верчын тыршен. Тидлан кӧра икшывыж ден уныкаже-влак кувавам мот­коч йӧратат да пагалат.

Венера АГЛЯМОВА