«Писынрак, кўшкырак, виянрак»

Российыште Физкультурникын кечыже августын кокымшо шуматкечыштыже палемдалтеш да тений 9 августлан логалын. Пайрем калыклан спортын да физкультурын илышыште кўлешан улмыштым ончыкташ, йоча ден самырык-влакым нунын дене пенгыде кылым кучаш кумыландаш виктаралтын. Физкультурникын кечыжым спортсмен, тренер, физкультурым туныктышо, спортын ветеранже да спортым йєратыше тыглай ен-влак палемдат. Шуматкечын нуно чыланат Сабантуй олыкышто погыненыт. Физкультурник ден спортсмен-влакым Мишкан район МР администраций вуйлатыше Лариса Александрова, физический культура, спорт, туризм да молодежный политика шотышто комитет председатель Алена Фатхинурова, ДЮСШ директор Роман Ямаев да Мишкан районысо сарын, пашан, Вооруженный Вийын да законым аралыше органын ветеранже-влак организацийын председательже Юлия Балахнина шокшын саламленыт. Салам шомак деч вара пашаштышт ойыртемалтше тренер, физкультурым туныктышо, спортын ветеранже, спорт илышыште чулымын участвоватлыше тыглай ен-влакым чап кагаз да тауштыме серыш дене палемдыме. Кужу жап пашам ыштымыштлан да Мишкан районышто физический культура ден спортым вияндыме верч пале надырым пыштымыштлан, Всероссийский физкультурникын кечыже лўмеш Мишкан район МР советын да администрацийын чап кагазше дене Кўрзе ялысе школышто физкультурым туныктышо Виктор Байгузин ден спортын ветеранже-влак Яков Апсатаров ден Аксинья Саляева палемдалтыныт. Мишкан селан чолгаенже Александр Мурзабаевым Уфа оласе ГО администрацийын физический культура да спорт управленийже кум чап кагаз дене палемден. Тудо Физкультурникын всероссийский кечыжлан лўмлалтше спорт фестивальыште участвоватлен, вер гыч кужытыш тєрштымаште икымше верым налын, отжиманийым ыштымаште – кокымшым, ончыко лаплиймаште – кумшым. Мероприятийыште спортсмен-влак творческий усталыкыштымат ончыктеныт. Монар гыч Светлана Яншаева сылне мурым мурен, Мишканыште илыше Леонид Иванов онай марла почеламут-влакым лудын. Пайремым ДЮСШ-н методистше Ульяна Хазиева устан да онайын вўден. Физкультурникын кечыжым палемдымашке ўстел теннис дене Россий спортын мастерже Дарина Апсатарова толын. Тудо погынышо-влак дене онай зарядкым эртарен. Зарядке деч вара кугу сенымашыш шуаш полшышо икымше тренерже-влаклан – Наталья Апсатарова аважлан да Яков Апсатаров кочажлан тау мутым каласен. Пайрем кечын Сабантуй олыкышто городки да волейбол дене модмаш-влак эртеныт. Кумылан-влак ГТО нормативым сдатленыт. Тиде пашашке илалше-влакат кумылын ушнат. – Тений ГТО нормативым 60 ияш деч кугурак 70 ен сдатлен, – ойла муниципальный ГТО тестирований рўдер вуйлатыше Татьяна Шамиданова. – 2024 ийыште ГТО-м сдатлыме шотышто ме республикысе эн сай 10 район радамышке пуренна. 4 гыч 6 август марте ГТО-м сдатлыше илалшына-влак Стерлитамак олаште эртыше Башкортостан Республикысе пенсионер-влак кокласе X спартакиадыште вийыштым тергеныт. Командышкына пуреныт: Виталий Андреев, Владислав Аптраев, Тамара Григорьева, Софья Кибаева, Иван Русинов, Аксинья Саляева, Юрий Салмияров да Юлия Якитова. Стерлитамак оласе «ДЮСШ 2» ДО МАУ-што 24 команде погынен, спортсмен-влак программын 7 видыштыже вийыштым тергеныт. Спортсменна-влак сай могырчын ойыртемалтыныт. Тамара Григорьева 50 метрыш иймаште, Владислав Аптраев 1 километрыш куржмаште икымше верлам налыныт, Аксинья Саляева ўстел теннис дене модмаште кумшо лийын. Районыштына физкультурно-тазартыме паша сайын шукталтеш. Тидын шотышто республикыштына ме ончыл верлаште улына. Спортсменна-влак республик, Россий, тўнямбал кўкшытан танасымашлаште чўчкыдын призовой верлам налыт. Спорт пайрем годым ме физический культура, спорт, туризм да молодежный политика шотышто комитет председатель Алена Фатхинурова дене мутланышна, тудо районыштына спорт кузе виянме дене палдарыш: - Радий Хабиров каласен: «Спорт Башкирийын политикыштыже тўн направленийым налын шога». Тидын дене келшыде ок лий. Районысо образовательный учрежденийлаште 119 спорт секций ден туристический кружок пашам ыштат, нуно 2673 йочам чумыреныт. Районысо спортзал ден ФОК-ышко 1585 ен коштеш, фитнес рўдер ден тренажерный заллашке – 553 ен. Поход ден экскурсийлаште 6218 ен участвоватла, 850 ен ече дене куржталеш. Районыштына спортсмен-влак спортын 15 видше дене кылым кучат. Нунылан районыштына идалык мучко 180 наре спортивный мероприятий эртаралтеш. 2024 ийыште Башкортостан Республикысе «Таза тукым – виян регион» региональный проект кышкарыште Мишкан районышто тўналтыш класслаште тунемше-влаклан спорт оборудований ден инвентарьым налме. Тидыже йоча-влаклан изинек спорт дене кылым кучаш да танасымашлаште сай результатым ончыкташ йєным ыштышаш. Кугу спортсменна-влакат изи огыл сенымашыш шуыт. Пий дене танасымаште лум дисциплиныште Любовь Мурзашева Уралын да Сибирьын кубокыштым сенен налын. Тудым Сергей Михайлович ден Лариса Николаевна Мурзашевмыт тренироватлат. Эренбург Миксонов коштын кертдыме-влак коклаште всероссийский танасымаш ден Российын кубокшылан модмаште паракаратэ да ўстел теннис дене модмаште икымше верым налын. Moscow Cup боевой искусство-влак дене тўнямбал танасымашлаште (киокусинкай) мемнан рвезына-влак – Ильяс Сабиров, Ислам Каримов да Михаил Чамуков икымше верлам сенен налыныт. Ильяс Сабиров тыгак Москва олаште эртыше всероссийский танасымаште сенен. Мутланымаш мучаште Алена Валерьевна «Келшымаш» газетым лудшо-влаклан поро тыланымашым каласыш: - Пайрем кечын спорт да физкультур дене илышыштым кылдыше чыла енымат алал кумылын саламлыме шуэш! Нунылан чылаштланат «Писынрак, кўшкырак, виянрак» девиз почеш пенгыдын ончыко ошкылаш тыланем. Тек нине кум мут тыланда кугу у сенымашыш шуаш полшат! Таза да чулым лийза!

Светлана ТОЙМУРЗИНА