Куржыныт да ийыныт

Таҥасымаш 11-12 августышто Татарстан Республикын рўдє олаштыже – Озаҥыште нылымше гана эртен. Тушто Россий Федерацийысе 37 кундем гыч 1000 утла еҥ вийжым терген.
KAZAN TRIATLON 2023 таҥасымаште кок кече жапыште спортсмен-влак триатлон дене таҥасеныт, тушто ияш, куржаш да велосипед дене кудалаш кўлын. Таҥасымашым Timerman – Татарстан Республикыште спортивный таҥасымаш-влакым эртарыше организаций ямдылен да эртарен.
11 августышто спортсмен-влак ик да кок теҥыз мильым ийын каеныт, 300, 600 метрыш, 1 километрыш куржыныт. Мучашлан 3 да 6 километрыш свимран эртен, тушто дистанцийыште икмыняр гана куржаш да ияш пернен.
12 августышто триатлон дене таҥасымаш эртаралтын. Тушто спортсмен-влакым 113 километр кужытан дистанций вучен: 1,9 километрым ийын эрташ кўлын, 90 километрым – велосипед дене кудалаш, 21,1 километрым – куржаш.
Тиде дистанцийыште 55-59 ияш-влак коклаште Мишкан селасе йоча-юношеский спорт школын куштылго атлетика дене старший тренерже Юрий Айгузин таҥасен да сеҥышыш лектын. Триатлонын дистанцийжым тудо 5 шагатат 24 минутат 53 секундышто эртен. Тиде дистанцийыште тыгай ийготан-влак коклаште чылаже 94 еҥ таҥасен.
Юрий Айгузиным кугу таҥасымаште тыгай сеҥымашыш шумыж дене алал кумылын саламлена да районын чапшым тыгай кўкшытыш нєлталмылан чон гыч лекше тау мутым ойлена!
Светлана ТОЙМУРЗИНА.