Башкортостан Республикысе Мишкан район МР администраций вуйлатышым сайлыме

2021 ий 16 июльышто БР-се Мишкан район МР ви­зымше созыв Советын XI заседанийже эртен, тушто Мишкан район МР админи­страций вуйлатыше сайлал­тын.

Заседанийыште лийыныт: БР вуйлатышын граждан да органи­заций-влакын обращенийышт шо­тышто управленийже начальник А. Г. Попков, БР-се Кугыжаныш Погын – Курултайын секретари­атше вуйлатыше Ш. Р. Музамет­динов, БР вуйлатышын муници­пальный образований-влак дене кылым кучымо шотышто управ­ленийжын тўҥ советникше Ш. Г. Фаррахов, Мишкан районын про­куроржо Д. Р. Ишмуратов, рай­онысо Советын депутатше-влак, районысо предприятий да учреж­дений вуйлатыше-влак.

Заседанийым Мишкан рай­он МР Совет председатель В. А. Сабиров вўден. Мишкан район МР администраций вуйлатышым сайлыме шотышто конкурс нерген комиссий председательын заме­стительже А. Г. Попков увертарен. Конкурсный комиссий куд еҥ гыч шоген, тушечын пелыже Баш­кортостан Республик вуйлатыше Р. Ф. Хабировын представитель­же-влак лийыныт, вес пелыже – Мишкан район МР Советын пред­ставительже-влак.

Конкурсный комиссийын 2021 ий 9 июльысо пунчалже дене келшышын, келшыше доку­мент-влакым пуымеке, конкур­сышко кум конкурсант ушнен, нунын кандидатурыштым «Баш­кортостан Республикысе муни­ципальный образований-влак совет» ассоциацийын экспертный комиссийышкыже колтымо. Кон­курс деч вара 16 июльышто Миш­кан район МР администраций вуйлатышылан кок кандидатым ойырымо: Трапезников Павел Владимировичым да Сафин Ринат Фагилевичым.

Заседанийыште депутат-влак кажне кандидат верч йўклаш пун­чалым луктыныт. Ондак конкур­сышто эн шуко баллым погышо кандидатлан йўклаш лийыныт. Мишкан район МР Советын де­путатше-влак ий ой дене Трапез­ников Павел Владимировичын кандидатурыжлан йўкленыт.

«Россий Федерацийыште ве­рысе самоуправленийым ор­ганизоватлыме чумыр прин­цип-влак нерген» федеральный законын 37-ше статьяжын 6-шо ужашыж дене, Башкортостан Республикысе «Башкортостан Республикыште верысе само­управлений нерген» законын 11.5 статьяжын 3-шо ужашыж дене, БР-се Мишкан район МР уставын 22-шо статьяжын 7-ше ужашыж дене келшышын, БР-се Мишкан район МР Совет БР-се Мишкан район МР администра­ций вуйлатышылан контракт почеш Трапезников Павел Вла­димировичым шогалташ пунча­лын. Тиде пунчал БР-се Мишкан район МР администраций дене контрактым ыштыме жап гыч вийым налеш, контракт «Россий Федерацийыште муниципаль­ный служба нерген» федераль­ный законын 28-ше статьяжын 11-ше пунктшо дене келшышын допускым оформитлымеке под­писатлалтеш.

Район администраций вуй­латышылан сайлымеке, Павел Владимирович погынышо-вла­клан тыге каласен: «Тиде мы­лам кугу чап да ончыкыжымат Мишкан районысо калык верч тыршаш таратыше амал. Райо­нысо калыкын, республик вуй­латыше-влакын, депутат корпу­сын ўшаныштым шукташ манын, вием чаманыде тыршаш тўҥа­лам».

Т. КОЛЕДИНА, Совет секретарь.