Пионер жап ок мондалт

Пайремым верысе Культура пєртын методистше С. Я. Яникеева ден библиотекарь Л. Я. Иванова эртарышт. Мероприятий пеш ямлын эртыш.
Организатор-влак йоча-влаклан ятыр оҥай заданийым ямдыленыт ыле. Мыламат, ончыч пионервожатый лийын ыштымемлан кӧра, мутым пуыч. Мый йоча-влаклан ончычсо пионер илыш нерген ойлышым, горн дене шокташ туныктышым, барабаным кузе кырымым умылтарышым. Йоча-влак почешем кумылын горн йўкым луктыныт да барабаным кыреныт. Тўҥалтыш класслаште туныктышо Ю. Алишева тунемше-влакым пионер-влакын товатмутышт, законышт дене палдарыш. Варажым чыланат «Взвейтесь кострами» мурым колыштна. Мутшым палыше-влак шкат почеш муреныт. Йӧн дене пайдаланен, пионервожатый лийын ыштымем дене лудшына-влакым палдарем.
Мемнан тунемме жапыште кыдалаш школышто могай-гынат профессийлан туныктеныт. Ме, 33 еҥ, пионервожатыйлан туенемме классыш логална. Старший пионервожатыйлан туныктымаште Пионер пєртын директоржо П. С. Паляев кугун тыршен. Тудо пионер, комсомол, фото пашалан туныктен. Пионер пєртыштє струнный кружок пашам ыштен. Ме тушко коштынна, чылан мандолин дене шоктен моштенна. Уфашке педпрактикым эрташ ик арнялан миенна. Оласе школлаште тўрлє мероприятий-влакым онченна. Кажне кеҥеж каникулышто «Инчур» пионер лагерьыште вожатый лийын пашам ыштенна. Икманаш, тудо мемнам пионервожатый лияш туныктен, ямдылен. 11 классым пытарымеке, 19 еҥым районысо тўрлє школлашке старший пионервожатыйлан пашаш колташ полшен. Ме П. С. Паляевлан эре тауштен илена. Тудо ынде ты тўня дене чеверласен.
Тачысе кечылан 19 вожатый гыч латнылытын кодынна. Матрена, Лиза, Лена, Таня, Зоя, Муния, Нафиса, Соня, Лида, Люся, Фаниса, Лариса, Маша, йєн дене пайдаланен, чыландамат эртыше Пионер кече дене саламлем. Ямле пионер жапна мемнан чоныштына курымешлан кодеш! Таза, кужу ўмыран да пиалан лийза! Икте-весым ида мондо да пеҥгыде кылым кучыза!
Тендан поро йолташда Маша ГАРЕЕВА (ИБАЕВА), Нерге ял.