Шонымашышт шукталтын

Тӧҥгак ял калык шонымашыжым шуктен кертын. Нуно уже икмыняр ий ончычак водопроводыштым олмыкташ шонен пыштеныт. Тиде пашам тений верысе инициативылан полыш программе полшымо дене ыштен кертыныт.
Шонымашым илышыш шыҥдараш манын, ондак калык погынымашым эртареныт, тушто ППМИ – 2026 программыште участвоватлаш да водопроводым олмыкташ пунчалме.
Эре вҥд кажне суртлан кажне кечын кӱлеш, да шагал огыл. Ялыште водопровод, конешне, уже лийын, но 2026 ийлан кӱртньӧпуч-влак палын рӱдаҥыныт. Тидлан кӧра нуным вашталташ кӱлын. Жап ончыко кая. Ожно водопровод-влакым кӱртньӧ пуч-влак дене ыштеныт гын, кызыт у материал-влакым кучылтыт. Тидлан кӧра нуным полиэтилен пуч-влаклан вашталтыме. Вет полиэтилен ок рӱдаҥ да кужу жап ок тоштем.
Йӱклымаш деч вара паша проектым ямдылыме, тудет «Текущий ремонт водопровода в д. Иликово» манылтын. Районысо финанс управлений начальник Алена Ишбулатован мутшо почеш, проект 96,8502 баллым поген да чыла текшырымашым эртен - сайлыше комиссий тудым йӧплен.
Ик жап гыч ял уремыште куатле технике пашам ышташ тӱҥалын. Тудым Вадим Шамтиев виктарен. Тыге траншей кӱнчалтын, пуч-влакым Максим Иманбаев ушкален. Паша шуко лийын гынат, подрядчик – Фаршатов Фагадий Фавзятович ИП – тудым палемдыме жапыште ыштен пытарен.
- Ме тиде татым кужу жап вученна, - ойла ялыште илыше Галина Абдулгакова. – Кажне телым чатлама йӱштыштӧ пуч-влак ынышт шел манын ойгырен шинченна. Ынде чонна лушкен. Вет вӱд деч посна ик кечымат илаш ок лий.
Пашам пытарымеке, ял калыкым район администраций лӱм дене саламлаш районысо финанс управлений начальник Алена Ишбулатова миен. Тудо суапле пашаште ойыртемалтше-влакым Мишкан район МР администрацийын да советын тауштыме серышышт дене палемден. Наградым тиде кечын Вадим Дигитаев, Эдуард Иманбаев, Елена Байрамова, Георгий Вайсин, Инга Дигитаева, Радион Осиев, Сергей Татарников, Алена Илиева да Ирина Ташбулатова налыныт.
Ял калыкым саламлымашке Ардаш сельсовет СП администраций вуйлатыше Радион Сайдуганов ушнен. Тудо суапле пашаште ойыртемалтше-влаклан СП администрацийын тауштыме серышыжым кучыктен.
Тылеч вара поро пашам ышташ полшышо-влакым ял калык тауштен. Ялыште илыше-влак посна тау мутым верысе СП администрацийын пашажым виктарыше Ирина Ташбулатовалан ойлымо. ППМИ-ште участвоватлыме пашам лач тудо виктарен шоген.
Саламлымаш да тауштымаш-влак деч вара калык ончылно Инга Дигитаева вуйлатыме «Алан» ансамбль выступатлен. Тиде ансамбльын участникше-влак кокла гыч поснак гармонист Станислав Дигитаевым палемдыме шуэш. Тудо гармоньым пеш сылнын, кумылым савырен шокта. Шоктымашыже ожсо легендым мурымыла солна, шӱм-чоным тарвата.
Мероприятий, поро йӱла почеш, марий «тывырдык» дене мучашлалтын. Куштымашын вес лӱмжӧ - «кандыра». Тушто куштен, калык иктышке ушна, икоян лиеш. Тидыже тыгак лийшаш, вет посна-посна илен калыклан кӱлешан ик пашамат ышташ ок лий.