«Йокрокланаш жап уке»

«Йокрокланаш жап уке»

Районыштына Семен Пазачевич Ирбулатовым палыдыме е‰же укеат, очыни. Мемнан юбилярна 50 ий наре тўрлє вере пашам ыштен. Кажне паша верыштыже тудым уста, поро да чын айдеме семын шарнат. Эртыше кечылаште Семен Пазачевич 65 ияш юбилейжым палемден.

- Тиде шуко але шагал? - йодам мый юбиляр деч.

- Айдемылан тиде шагал огыл, а сандалыклан пычырик гына, - лие вашмут.

Мый юбиляр дене пырля пашам ыштен омыл гынат, тудын пашаже, илышыже эре шинчаончылнем лийын. Кужу жап районный газетыште пашам ыштыме годым ик гана веле огыл тудын дене вашлияш пернен. Кеч-могай должностьышто пашам ыштен гынат, чумыр вийжым пуэн, лийже манын тыршен. Интернетым шерын шинчышылан, «Яндекс» кычалме системыште мый моткоч палыме чурийым ужым. «Кто есть кто в Республике Башкортостан» справочно-информационный книга гыч ўмбакем Семен Пазачевич Ирбулатов ончен. Самырык годсо фотожо мыйымат самырык пагытышкем пєртылтыш. Корреспондент улмем годым Калинин лўмеш колхозыш самырык агроном деч интервьюм налаш миенам. Тидлан амалжат лийын, Калинин лўмеш колхоз пырчан да кормалык культурым ончен-куштымо шотышто ончыл радамыш лектын. Самырык агроном С. Ирбулатов тургым жапыште йўдшє-кечыже пасушто эртарен. Тыршымыже арам лийын огыл, гектар гыч 20-30 центнер дене шурным погеныт.

А молан кызыт пасу паша начарын мия? Мландыжат тудак, е‰-влакат тылзе гыч волышо огытыл. Тиде йодышлан Семен Пазачевич вашмутым вик ыш пу, ик жап шонен шинчышат, эркын ойлаш тў‰але:

- Тидлан вашмут пеш проста да тыгодымак пеш неле, - манеш тудо. - Ме пукшышо Мланде-авам шотлымым чарненна. Мландыш ўя‰дышым лукташ кўлеш, сай урлык шурным ўдаш, моштен кандарыман, вес семынже каласаш гын, севооборотым да молымат чын ыштыман. Специалист-влак мыйым умылат.

Семен Пазачевич дене ятыр жап, тўрлє темылан мутланышна. Материал чумыр книгалык погынен кертеш, но газет страницыш чылажым шы‰дараш ок лий.

Интернет лаштыкыште возмо биографийжым лудам. Тудо 1952 ийыште Тєргымдўр ялыште шочын. Ешыште кокымшо йоча лийын. Ачаже Пазач Ибатович ден аваже Марзива Алкечевна Ирбулатовмыт тыглай колхозник лийыныт.

1971 ийыште Дуванский ял озанлык техникумыш тунемаш пура. Тудым сайын пытарен, Калинин лўмеш колхозышто агрономлан ышташ тў‰алеш. 1975-1979 ийлаште Кугу Соказа сельсоветын председательже, Мишкан КПСС райкомын инструкторжо; 1979-1987 ийлаште партком секретарь, Калин лўмеш колхозын председательже; 1987-1989 ийлаште «Мишкинский» совхозын управляющийже; 1989-1990 ийлаште КПСС райкомын инструкторжо; 1990-2000 ийлаште «Мишкинский» совхоз директорын заместительже, отделенийын управляющийже.

Семен Пазачевичын биографийыштыже посна корно дене «Социальный» магазинын директоржо должностьым ончыктымо. У верыште тудо кум ий калыклан сатум ситарыме верч тыршен. Вет 90-шо ийлаште кевытлаште сату лийын огыл, чыла вере черет. Чыла тидым Семен Пазачевич чон корштен ончен да шкаланже цельым шынден: «Калыклан сатум ситараш». Тыште тудлан ончычсо палымыже-влак, кудышт ты жаплан кугу тєра радамыш лектыныт, полыш кидыштым шуялтеныт. «Социальный» магазин эркын йол ўмбаке шогалын, Башпотребкоопераций системыште ончыл радамыш лектын.

Илыш эркын тєрланен. Коммерсант-влак сатум калыклан ситараш тў‰алыныт. Семен Пазачевичлан у пашам - Мишкан район администрацийыште дела управлящий должностьым темленыт. Сулен налме канышыш лекмешкыже тушто тыршен.

Пенсийыш лекмекыже еш, икшыве ден уныка, сурт сомыл йокрокланаш жапым пуэн огытыл.

Илышын чыла йыжы‰ыштыже тудын пе‰гыде тылже, йєратыме ватыже, икшывыже-влакын поро авашт, уныка-влакын йєратыме кувавашт Валентина Сергеевна лийын.

- Тыгай пе‰гыде тылем ок лий гын, илышыште ыштыме пашамын пелыжат ок шукталт ыле, очыни, - манеш юбиляр.

У ий, юбилей пайрем-влак эртен кайышт. У ийыште Семен Пазачевич ден Валентина Сергеевна чыла икшывышт, родо-шочшышт деке унала коштын савырнаш шонат. Ветеран-влаклан йокрокланаш жап уке, вет илыш тў‰алеш веле!

В. КОНДОГИН.