Омса уэшын почылтын!

Клубым уэмден почмо лӱмеш пайремышке ятыр еҥ погынен. Нунын коклаште йоча-влакат, самырык-влакат, илалше-влакат лийыныт. Вет ялыште тӱвыра возак чылалан кӱлешан.
- Таче кече исторический, манаш лиеш. Капитальный ремонт деч вара Кугу Соказа ялысе Тӱвыра пӧрт уэшын омсажым почеш! – каласен мероприятийым почмо годым пайрем вӱдышӧ Василий Кутлуметов.
Палдарена: Тӱвыра пºртым «Башкортостан Республикыште тӱвыра ден сымыктышым вияҥдымаш» («Развитие культуры и искусства в Республике Башкортостан») республиканский программе почеш олмыктымо.
Ял калык тиде кечым кужу жап вучен. Олмыктымаш деч вара Тӱвыра пӧрт палын вашталтын: тӧрза, омса-влакым, кӱвароҥа ден потолокым вашталтыме, пырдыж-влакым штукатуритлыме... Икманаш, тушто ынде кеч-могай мероприятийым да пайремым эртараш лиеш.
Ялысе тӱвыра возакым уэмден почмо дене калыкым алал кумылын Мишкан район МР администраций вуйлатыше Лариса Александрова ден Башкортостан Республикысе культура министрын заместительже Эльза Карамурзина саламленыт.
Тылеч вара суапле пашам ышташ полшышо-влаклан чылаштланат тау мутым Кугу Соказа сельсовет СП администраций вуйлатыше Станислав Сергеев ден тиде ялын шочшыжо, Пӱрӧ районысо МР советын депутатше, предприниматель да меценат Вячеслав Сабиров ойленыт.
Саламлымаш да тауштымаш деч вара мутым культура пашаеҥ Станислав Янышевлан пуымо. Тудо уна-влаклан клуб кӧргыштӧ оҥай экскурсийым эртарен, тудын историйже нерген ойлен. Тений тиде Тӱвыра пӱртым ыштымылан 40 ий темын улмаш.
Клуб кӧргыштӧ тыгак верысе музей уло. Тушто шуко ожсо арвер аралалтеш. Музейыш пурымеке, ожсо илыш нерген ятыр оҥайым пален налаш лиеш.
Экскурсий деч вара уна-влак ден калыклан ямле концертым ончыктымо. Сценыште шкеныштын усталыкыштым тиде кечын тыгай коллектив да посна артист-влак ончыктеныт: «Соказа сем» (Анастасия Асмаева вуйлата), «Ладушки» (Ирина Шамуратова), «Березка» Ирина Аликаева, «Муро памаш» (Надежда Михайлова) мурышо ансамбль-влак, Кугу Соказа Тӱвыра пӧрт пеленсе йоча хор, Мишкан районысо Т¢выра полат пеленсе «Душа» трио, Апековмыт дуэт, «Юго» куштышо калык ансамбль (Алексей Иванов), мурызо-влак - Руслан Янситов, Олесия Мусалина, Анастасия Белоусова, Анастасия Асмаева да Милена Апекова.
Концерт номер-влак кокла гыч посна Кугу Соказа ялысе Тӱвыра пӧрт пеленсе йоча хорын «Родина моя» мурыштым посна палемдыме шуэш. Тиде муро мероприятийлан пеш келшен толын да ончышо-влакын шӱм-чоныштын чынжымак савырен кертын.
Ме ӱшанена: ремонт деч вара Кугу Соказа ялысе Тӱвыра пӧрт у вий ден у шӱлышым налеш, а калык тушко кумылын кошташ тӱҥалеш. Поснак – самырык-влак.
- Ме т¢выра возакна кӧргыштӧ эре алал кумыл да творческий шӱлыш озаланышт манын тыршенна, тыршена да ончыкыжымат тыршаш тӱҥалына, - каласыш мероприятий мучаште мыланна культурно-досуговый пашам шуктымо шотышто вӱдышӧ методист Анастасия Апекова. - Тӱвыра пӧртнам почмо лӱмеш пайрем ямлын эртыш. Ме ӱшанена – клубна ончыкыжымат калыкнам чумырен шогаш да марий калык тӱвырам аралыше возак семын пашам ышташ тӱҥалеш да калыкым ятыр гана куандара. Ме тыште кажне еҥым алал кумылын вучена! Омасана чылаланат почылтын!