«Ачам йӧратен…»

Российыште ачан кечыжым ий гыч ийыш кумданрак палемдат. Тиде тыгак лийшаш, вет ача ава семынак ешыште ик кугу верым налын шога. Ачан кечыже – тиде ача-влакым саламлаш ешартыш амал да ешыште тудын рольжым нєлталаш полшышо, илышыште тудын ответственностьшым кугемдыме кече.
Ачан кечыжым пайремлыме кышкарыште районысо культура учрежденийлаште тўрлӧ мероприятий-влак эртеныт.
18 октябрьыште Тӧҥгак клубыштат тиде кече лўмеш пайрем мероприятий эртен. Тиде культура учреждений районышто ик эн чолган пашам ыштышылан шотлалтеш. Учрежденийын методистше Инга Дигатаеван тыршымыжлан кӧра ик пайремат палемдалтде ок код.
Тудо мероприятийым организоватлыше гына огыл, а клуб ден калыкым ушен шогышо улеш.
«Ачам йӧратен…» пайрем мероприятийын программыже пеш поян да оҥай лийын. Уна-влак икте-весышт дене мутланеныт, сылне концертым онченыт. Кугу верым кызыт специальный военный операцийыште улшо рвезе-влакын ачаштлан ойырымо. Нунылан Тауштыме серышым кучыктымо.
Верысе ветеран-влак совет председатель Елена Байрамова шке выступленийыштыже палемден:
- Ача-влак мемнан икымше наставникна, мемнан геройна да эн сай йолташна улыт. Нуно мемнам пеҥгыдылыклан, лўддымылыклан да уш-акыллан туныктат. Нунын тыршымыштлан да полшымыштлан ме виянрак лийына, нелылыкым сеҥаш тунемына, сеҥымашлан куанена. Кажне еҥ шке чоныштыжо ачаж дене эртарыме эн сай жап-влакым ашна. Ача-влак мыланна йєратымашым пуат, шке илыш опытышт дене пєлалтыт. А тидыже илыш корно дене ўшанлын ошкылаш полша. Ме ялыште илена. Илыш ик верыште ок шого. Мемнан ачана, пелашна, пӧръеҥна-влак деч посна нимогай пашат ок воране ыле. Тений мемнан ялыште пеш шуко паша ышталтын. А тыштыже лач нуын, пӧръеҥ-влакын суапле надырышт. Те – ялын эҥертышыже да ўшанже улыда. Таче ме чыла ача ончылан вуйнам савена. Тек кажне кечыда куаным конда.
Пайрем касыште икшыве-влакын шке ачаштым саламлыме видео тыланымаш-влак ончыкталтыныт.
Пайрем пеш поро шўлыш дене эртен.