Оҥай погынымаш

Семинар чолга да чулым мероприятий – «Ретро-энергия 90-х и нулевых» дискотеке дене тӱҥалын, тудет Озерка ялысе клубышто эртен. Методист О. Михайлова культура пашаеҥ-влакын шӱм-чонышкышт чолгалык ден алал кумылым, ностальгий ден драйвым устан пуртен. Ямле муро-влакым колыштмеке, семинарын участникше-влак пашам у вий дене ышташ кумылаҥыныт.
Озерка гыч культура пашаеҥ-влак Новотроицкий ялысе клубыш каеныт. Тушто методист О. Денисова «Покупай, гуляй, сыграй» лӱман ярмиҥгам эртарен. Тиде мероприятийыште экскурсий, сатулымаш да модмаш иктышке ушненыт. Тӱҥжӧ тиде клубыштат алал кумыл да пайрем шӱлыш озаланеныт.
Козаш ялысе клубышто верысе методист Е. Романенко эмле деч деч эмле юлымашым – «Улыбкомедитацийым» эртарен. Воштылмашым ӱмбал маныт гын, ойлат, пуйто вич минут воштылмаш ик стакан ӱмбалым вашталта, шыргыжмашыже лай лиеш. Икманаш, организатор-влакын ойышт почеш, уна-влакын мӱшкырышт кечывал кочыш деч поснак темшаш лийын. Шыргыжын медитацийым эртарымаш чынжымак пайдале улмаш, тудо еҥ-влак коклаште вашкылым пеҥгыдемдаш, икте-весым умылаш, пашам тыршен ышташ полша... Но шужымо годым нимо дене полшен ок керт улмаш, тидлан кӧра культура пашаеҥ-влак Козаш гыч вашкен вес ялыш кудалыныт.
Семинарын пытартыш мероприятийже Изи Накаряк ялысе Тӱвыра пӧртыштӧ эртен. Тушто культура пашаеҥ-влаклан «Свадебный переполох, или как мы молодых женили» лӱман оҥай мероприятийым ончыктымо. Рашрак лияш гын, нунат тиде пайремын участникше лийыныт.
Оҥайлыклан поян мероприятий-влак деч вара тӱвыра пашаеҥ-влакын совещанийышт эртен. Тушто нуно тӱрлӧ йодыш почеш каҥашеныт да ончыкылыклан паша планыштым рашемденыт.