«Ме пырля»

Кажне ийын июньышто интернат-влак туристический слетышто участововатлат. А тений Башкирийыште инвалид-влак верч азапланыме идалыклан урвертарымылан кєра ме єрдыжеш кодын огына керт. Кок кече жапыште Мишкан селасе Паралимпийский рўдерыште «Ме - пырля» республик кўкшытан тўвыра да спорт пайрем эртен. Тиде гана ты мероприятийым Пўрє оласе психоневрологический интернат организоватлен. Тудо республикысе коло интернат гыч коло ик командым ты мероприятийыш ушен кертын. Кок кече жапыште фестивальын участникше-влаклан палаткылаште илаш да тыгодымак могай тале да виян улмыштым ончыкташ логалын. Участник-влак эн ончычак регистрацийым эртеныт, вара шеравам кучымо почеш могай интернат могай номер почеш выступатлышашым рашемденыт. Турслетын программыже пеш поян лийын, участник-влаклан шке лагерьым ышташ да палаткым шогалташ кўлын. «Путник» йоча туризм рўдерын специалистше-влак, жюри, палаткым чын шындыме, тулото олмым ойырымо, аптечка улмо да моло кўлешым текшырен лектыныт. Салават оласе психоневрологический интернат мемнам кенеж гыч теле жапыш кусарен да шкенжын У ий пайремжым палемден. А тиде унагудыш пурымаште мемнам Йўштє кугыза ден Лумўдыр вашлийыныт. Йўштє кугыза толшо чыла уналан тамле кексым кучыктен. Моло интернат-влакын площадкыштат ойыртемалтше татвлак шуко лийыныт. Икымше кече мучаште, игече начар лийын гынат, турист муро смотр-конкурс эртен. Конешне, тидлан участник-влак ончылгоч ямдылалтыныт. Икымше кечын итогшо почеш ончыко Янаулысо психоневрологический интернат лектын. Кас кочкыш деч вара чылан тўшка построенийыш да лагерьым торжественно почаш чумыргеныт. Слетыш чумыргышо-влакым ўжмє уна-влак, нунын коклаште Еш, паша да калыкым социально аралыше министрын заместительже Азат Маратович Арсланов лийын, саламленыт. Тений турслетын программышкыже ятыр вашталтышым пуртымо. Мероприятийыште мобильный (коштын кертше) да маломобильный (коштын кертдыме) участник-влак лийыныт. Нунылан посна программа ямдылалтын. Мобильный командылан рюкзакым погымо программа лийын. Тиде этапыште палемдыме могай арвер-влакын походлан кўлешлыкшым, котомкам чын погымым текшырыме. Рюкзакым чын кылдымым да SOS йодмашым пуэн моштымо ончалтыныт. Пытартыш этапыште Октябрьский психоневрологический интернатын воспитанникше-влак ончык лектыныт. Нуно чыла знакым палыме да писын погымо шотышто гына огыл, а кажне знакым йўкын ойлен моштымышт дене ойыртемалтыныт. Тамле кечывал кочкыш деч вара чылан сцена ончылно флешмобышто участвоватленыт. Чумыр танасымаш деч вара жюри иктешлымашым ыштен. Пел баллан шукырак очком поген, Благовещенский психоневрологический интернат сенышыш лектын. Кокымшо верыш Октябрьский психоневрологический интернат, а кумшо верыш Серафимовский йоча интернат-пєрт лектыныт. Мишкан районын администрацийжылан фестивальым эртараш верым ойырымыжлан, паралимпийский рўдерын администрацийжылан сайын вашлиймыштлан, «Путник» рўдерлан да мемнан спонсорна-влаклан кугу таум ойлена.

Гульнара ГАЛАУТДИНОВА, Бирский психоневрологический интернат государственный бюджетный учрежденийын общественность дене пашам ыштыше специалистше.